ރައްޔިތުންގެ މަޖިލީހުގެ މެމްބަރުންގެ މުސާރަ ކުޑަކުރުމާ ބެހޭގޮތުން ބާރަށު ދާއިރާގެ މެމްބަރު އިބްރާހިމް ޝުޖާއު ކުރިން ދެއްކެވި ވާހަކަތައް ކެންސަލްކޮށްފިއެވެ.

މަޖިލީހުގެ މެމްބަރުންގެ އަދަދު ވަކިވަރެއްގައި ހިފެހެއްޓުމާ މެދު މެމްބަރުން ދެކެވަޑައިގަންނަވާ ގޮތެއް ބަލަން ޝުޖާއު ވަނީ ގަރާރެއް ހުށަހަޅުއްވާފައެވެ.

މި ގަރާރަށް ބަހުސްކުރަން ފެށުމުގެ ކުރިން ގަލޮޅު ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު އިބްރާހީމް ވިދާޅުވީ މަޖިލީހުގެ މެމްބަރުންގެ މުސާރަޔާ އިނާޔަތްތަކަށް ރާއްޖޭގައި ކުރާ ހަރަދު ބޮޑުކަމަށެވެ.

މެމްބަރު އިބްރާހިމަށް ރައްދު ދެއްވަމުން ޝުޖާއު ވިދާޅުވީ މެމްބަރުންގެ މުސާރަ ބޮޑު ނޫން ކަމަށެވެ.

އަދި މުސާރަ ކުޑަކުރުމާ ދެކޮޅަަށް އެންމެ ފުރަތަމަ ވާހަކަ ދެއްކެވީ ގަރާރު ހުށަހެޅުއްވިޝުޖާއު ކަން ވެސް ފާހަގަކޮށްލެވެއެވެ.

ނަމަވެސް މަޖިލިސް އިންތިޚާބާ ދިމާކޮށް ކެންޑިޑޭޓުންގެ މެދުގައި ކުރިޔަށް ދިޔަ ބަހުސްގައި ބަހުސްކުރައްވަމުން ޝުޖާއު ވިދާޅުވެފައިވަނީ އޭނާ ވެގެންދާނީ މަޖިލިސް މެމްބަރުންގެ މުސާރަ ކުޑަކުރުމަށް މަޖިލީހުގައި ވަކާލާތު ކުރައްވާނެ ފަރާތަކަށް ކަމަށެވެ.

ނަމަވެސް ފަހުން ޝުޖާއު މިވަނީ މުސާރަ ކުޑަ ކުރުމާއި ދެކޮޅަށް ވާހަކަ ދައްކަވާފައެވެ.

މިކަމާ ގިނަ ބަޔަކު އަންނަނީ ޝުޖާއު އަށް ފާޑުކިޔުން އަމާޒުކުރަމުންނެވެ. ޝުޖާއުގެ އިތުރުންވެސް ދެތިން މެމްބަރަކު ވަނީ މުސާރަ ކުޑަކުރުމާ ދެކޮޅަށް ވާހަކަދައްކަވާފައެވެ.