އިގްތިޞާދެއް ދިރިދެމި އޮންނަނީ މަސްވެރިން މަސްވެރިކަން ކުރާތީ ކަމަށާއި ސަރުކާރުގެ ނައިބު ވަޒީރުން ޓްވީޓް ކޮށްގެން ނޫންކަމަށް ވިދާޅުވެ އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ) ފާޑުކިޔުން އަމާޒުކޮށްފިއެވެ.
އޭނާ މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ. އެގޮތުން މިފަދަ ބައިވަރު ޕޯސްޓްތަކެއް އޭނާ ވަނީ ކޮށްފައެވެ.
ސަރުކާރުގެ ބައެއް ނައިބު ވަޒީރުން ހާއްސަކޮށް ސަސްޕެންޝަންގައި ތިއްބެވި ދެތިން ނައިބުން އަންނަނީ ވައްޑެ ސަރުކާރުން ވައުދު ނުފުއްދާކަމަށް ބުނާތީ ބަހުގެ ހަމަލާ ދެމުންނެވެ.
ސަސްޕެންޝަންގައި ހުންނެވި ޔޫތް މިނިސްޓްރީގެ ނައިބު މަރިޔަމް ޝިއުނާ ކައުންސިލްތަކަށް ފަޑުކިޔުން އަމާޒުކުރައްވާ ކުރެއްވި ޕޯސްޓް ރީޕޯސްޓްކުރުމަށްފަހު ވައްޑެ ވިދާޅުވީ ލާމަރުކަޒީ ޤާނޫނަށް ގެނެސްފައިހުރި ބަދަލުތައް ފެންނަން އޮންނާނެ ކަމަށެވެ.
ޑެޕިއުޓީ މިނިސްޓަރުން ލިޔާ އެއްޗެތީގައި ހަގީގަތެއް، ކޮންމެވެސް އުރަތްޕެއް ހުންނަންވާނެ ކަމަށް ވެސް ވައްޑެ ވަނީ ވިދާޅުވެފައެވެ.
އެހެންނޫނީ ޝިއުނާ ކުރައްވާ ޕޯސްޓްތަކުގެ ސަބަބުން އަނެއްކާވެސް ދައުލަތައް ބޮޑު ގެއްލުމެެއް ލިބިދާނެ ކަމަށް ވިދާޅުވެ ވައްޑެ ވަނީ އެފަދަ ސަރުކާރުގެ އިސް މަގާމެއްގައި ހުންނަވާ ޒިންމާދާރު ނޫން ވާހަކަތައް ނުދެއްކުމަށް ވެސް ގޮވާލާފައެވެ.
ޝިއުނާގެ ސަބަބުން އަވައްޓެރި ގައުމު އިންޑިޔާގެ ކުރިމަތީގައި ދިވެހި ސަރުކާރުން ވަނީ ކުޑަކަކޫ ޖަހަން މަޖުބޫރުވެފައެވެ.
