ސަސްޕެންޝަންގައި ތިބި ޔޫތު މިނިސްޓްރީގެ ތިން ނައިބުން ލައްވާ ރަސްމީ އެއްވެސް މަސައްކަތެއް ނުކުރުވައި މުސާރައިގެ ގޮތުގައި ހަ ލައްކައަށް ވުރެ ގިނަ ރުފިޔާ ދައުލަތުން ދީފިއެވެ.

އިންޑިއާގެ ބޮޑުވަޒީރު ނަރެންދުރަ މޯދީއަށް ސޯޝަލް މީޑިއާގައި ފުރައްސާރަކުރި މައްސަލައިގައި ޔޫތު މިނިސްޓްރީގެ ތިން ނައިބުން ކަމަށްވާ މަލްޝާ ޝަރީފާ މަރިޔަމް ޝިއުނާގެ އިތުރުން އަބްދުﷲ މަހުޒޫމް މުއްދަތެއް ނެތް ގޮތަށް ސަސްޕެންޑު ކުރީ މި އަހަރުގެ ޖެނުއަރީ 7، ގައެވެ.

ނައިބުންތައް ސަސްޕެންޑުކުރީ މައްސަލަ އިތުރަށް ބަލަން ކަމަށް ރައީސް އޮފީހުގެ ކޮމިއުނިކޭޝަން މިނިސްޓަރު، އިބްރާހިމް ހަލީލް އޭރު ވިދާޅުވެފައިވެއެވެ. އަދި އޭގެ ފަހުން ސަރުކާރުގެ އިސް ތަރުޖަމާނުވެސް ވަނީ ހަމަ އެ ބީދައިން ވިދާޅުވެފައެވެ.

އޭގެ ފަހުން މި މައްސަލައިގެ އަޕްޑޭޓެއް ސަރުކާރުން ދީފައިނުވެއެވެ. ނޫސްވެރިން ސުވާލުކުރުމުން ރައީސް އޮފީހުން އަދިވެސް ދޭ ޖަވާބަކީ އެ މައްސަލަ "ބަލަމުންދާ" ކަމަށެވެ.

މާޗު މަހުގެ ނިޔަލަށް ސަސްޕެންޑު ކޮށްފައި ހުރި ކޮންމެ ޑެޕިއުޓީ ވަޒީރަކަށް ވެސް ކޮންމެ މަހަކު 31،500ރ. ދޭ ކަމަށް ސަރުކާރުން ހާމަކޮށްފައިވެއެވެ.

އެހެންކަމުން މާޗު މަހުގެ ނިޔަލަށް ސަސްޕެންޑުގައި ތިބި ޑެޕިއުޓީ މިނިސްޓަރުންނަށް މުސާރައިގެ ގޮތުގައި 283،500ރ. ދައުލަތުން ދީފައިވާކަން ހާމަވެފައިވެއެވެ. އެއީ ކޮންމެ ބޭފުޅަކަށް 94،500ރ. އެވެ.

މި މައުލޫމާތު ސަރުކާރުން ހާމަކުރި ފަހުން ހަތަރު މަސްދުވަަސް ފާއިތުވެފައިވާއިރު، އެ ހަތަރު މަހުގެ މުސާރަ އެއް ކޮށްލުމުން ސަސްޕެންޑު ކުރިފަހުން މިއަދާ ހަމައަށް ކޮންމެ ނައިބު ވަޒީރަކަށް މުސާރައާއި އިނާޔަތްތަކުގެ ގޮތުގައި 220،500ރ. ދައުލަތުން ދީފައިވާނެކަން ހާމަވެއެވެ.

މިހާ ގިނަ ފައިސާ އެއްވެސް މަސައްކަތެއް ނުކުރުވާ ގޭގަިއ ބައިތިއްބައިގެން ސަރުކާރުން ތިން ނައިބަކަށް ޚަރަދުކުރާއިރު ރާއްޖޭގެ މާލީ ހާލަތާ މެދު ކަންބޮޑުވުން ފާޅުކޮށް ވޯލްޑް ބޭންކުން ދާދި ފަހުންވެސް ވަނީ މާލީ ހަރުދަނާ ފިޔަވަޅުތަކެއް ނާޅައިފިނަމަ ރާއްޖެ ބަނގުރޫޓުވުމާ ދިމާއަށް މިސްރާބު ޖަހާނެކަމަށް ހާމަކޮށްފައެވެ. އަދި ޚަރަދުކުޑަ ކުރުމަށް ރައްޔިތުން ހިތި ބޭސް ބޮއި ދިރިއުޅުމުގެ ހާލަތު ގަރުދިޔަ އާ ބަތާ ކައިގެން ތިރިކުރަން ޖެހޭކަމަށް ރައީސް އޮފީހުގެ މިނިސްޓަރުވެސް ވިދާޅުވެފައިވެއެވެ.