ސަސްޕެންޝަންގައި ހުރެ މުސާރަ ނަގަމުންދާ، ޔޫތު މިނިސްޓްރީގެ ނައިބު މަރިޔަމް ޝިއުނާ، ރައީސް އަބްދުﷲ ޔާމީނަށް އިހްތިރާމު ކުޑަކުރުމުން ރައްޔިތުން އޭނާ ލަދު ގަންނުވާލައިފިއެވެ.

ޝިއުނާ ވަނީ ރައީސް ޔާމީނަށް ކުޑައިމީސް ބަސް ރައްދުކޮށް އެކްސްގައި ޕޯސްޓެއްކޮށްފައެވެ. އެ ޕޯސްޓު އޭނާ ޕޯސްޓުކުރުމުން އޭނާއާ ގާތް ގުޅުން އޮންނަ ބައެއް ނޫސްތަކުންނާ އަދި ސަރުކާރުން ސްޕޮންސަރދޭ ބައެއް ނޫސްތަކުން ޚަބަރު ޝާއިއުކޮށްފައިވެއެވެ.

އެގޮތުން އެއިން ޚަބަރެެއްގެ ކޮމެންޓު ސެކްޝަންގައި ގިނަ ރައްޔިތުން ވަނީ، ހިތުން ޝިއުނާ ރައީސް ޔާމީންގެ ލަދުފުޅާ ގުޅޭ ގޮތުން ޕޯސްޓުކުރީ މަޝްހޫރުވާން ނަމަވެސް އެކަމުން ވެސް އޭނާގެ ލަދު ހަޔާތް ހުރި މިންވަރު ފެންނަމުންދާ ކަމަށް ބުނެފައިވެއެވެ.

މީގެ އިތުރުން ޝިއުނާއަކީ ލަދު ހަޔާތުގެ ވާހަކަ ދެއްކޭ ފެންވަރުގެ މީހެއް ނޫން ކަމަށާ އެގޮތުން ސަސްޕެންޝަންގައި ހުރެ ހަލާލު ނޫން މުސާރައެއް ނަގަމުންދާއިރު ލަދު ކޮބައިތޯ ވެސް ގިނަ ބަޔަކު އަހާ ސުވާލުކޮށްފައިވެއެވެ.

ޝިއުނާގެ އެ ވާހަކަތައް ރައްދުދިން މީހުން ވަނީ މީގެ އިތުރުންވެސް އެކަމާ ގުޅިގެން ނުރުހުން ފާޅުކޮށްފައެވެ. އެގޮތުން މީގެ ކުރިން ރައީސް ޔާމީން ވަރެއްނެތިގެން އުޅެފައި، އެމަނިކުފާނު ގިނިކަންޏާވީ ދުވަހު ޝިއުނާމެން ރައީސް މުއިއްޒު ފަހަތުން ފައިސާ އާ މަގާމުގެ ދަހިވެތިކަމުގައި ދުވަމުން ދަނީ ލަދު ޙަޔާތުގެ ކޮން މިންގަޑަކުން މިނެ ކިރައިގެންތޯ ވެސް ސުވާލުކޮށްފައިވެއެވެ.

ހަމަ އެހެންމެ ރައީސް ޔާމީންގެ ލަދުފުޅާ ގުޅުވާ ޝިއުނާމެން އެމަނިކުފާނުގެ އަގު ވައްޓާލަން މަސައްކަތްކުރަނީ ރައީސް މުއިއްޒު ހައްދަވަމުން ގެންދަވާ ދޮގުތައް ހެއްކާއެކު ރައްޔިތުންނަށް ހާމަކޮށްދެއްވަމުން ގެންދަވާތީ ކަމަށްވެސް ރައްޔިތުން ހާމަކޮށްފައިވެއެވެ.

ސަސްޕެންޝަންގައި ހުރެ އަތުން ފައިން މަސައްކަތެއް ނުކޮށް ރައްޔިތުންގެ ޓެކްސް ފައިސާއިން މުސާރަ ނަގަމުން ރައީސް ޔާމީނަށް އިހުތިރާމުކުޑަކޮށް ޝިއުނާ ޕޯސްޓުކޮށްފައިވަނިކޮށް އެކަމަށް ރައްޔިތުން ރައްދުދޭން ފެށުމުން، އެޗްޑީސީގެ މަތީ މަގާމެއް މި ސަރުކާރުން ދީފައިވާ އޭނާގެ ދޮން ބައްޕަ ފާއިޒު އަލީ އޭނާގެ ދިފާއުގައި ކޮމެންޓުކުރަން ފެށިއެވެ. ނަމަވެސް ރައްޔިތުންގެ ރުޅިގަނޑު ފަޅައިގެން ގޮސް، މުޅި އާއިލާ ރައްޔިތުންގެ ފައިސާގައި ދިރިއުޅެމުންދާއިރު ލަދު ކޮބައިތޯ އަހާ ރައްޔިތުން ސުވާލުކުރަން ފެށުމުން ފާއިޒުވަނީ ކޮމްނެޓު ސެކްޝަނުން ފިލާފައެވެ.

ޝިއުނާ ވަނީ އެއްވެސް މަސައްކަތެއް ނުކޮށްހުރެ ރައްޔިތުންގެ ފައިސާއިން 189،000 ރުފިޔާ ޖުލައި މަހުގެ 3 ވަނަ ދުވަހާ ހަމައަށް ނަގާފައިވެއެވެ.