ކުރީގެ ރައީސް އިބްރާހީމް މުހައްމަދު ޞާލިހްގެ ސަރުކާރުން ވެސް އަދި އަދުގެ ސަރުކާރުންވެސް އެމްއެމްޕީއާރްސީ ހިޔާނާތުގައި ގެއްލުނު ފައިސާ އަނބުރާ ހޯދައްވަން ނޫޅޭކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވެފައިވަނީ އެމަނިކުފާނު އަލަށް އުފައްދަވާ ސިޔާސީ ޕާޓީގެ ފަރާތުން ބޭއްވި ޖަގަހަ ޖަލްސާގައި ވާހަކަ ދައްކަވަމުންނެވެ.

އެމްއެމްޕީއާރްސީ މައްސަލައިގެ އެންމެ ބޮޑު މޭސްތެރިޔާ ކުރީގެ ނައިބު ރައީސް އަހްމަދު އަދީބް ކުރީ ސަރުކާރުން މިނިވަން ކުރައްވާފައިވާ ވާހަކަ ދެއްކެވުމަށްފަހު ރައީސް ޔާމީން ވަނީ ކުރީ ސަރުކާރަށް ފާޑުވެސް އަމާޒު ކުރައްވާފައެވެ.

މީރާ، އޮޑިޓާރ ޖެނެރަލް، ޕީޖީ، އެކި ލެވެލް ތަކުގެ ފަނޑިޔާރުގެތަކާއި އަދި މިނިސްޓްރީ އޮފް ފިނޭންސްވެސް އެބަހުރި ކަމަށާއި ގެއްލުނު ފައިސާ ހޯދުމަށްޓަކައި، އެހެންކަމުން މީގެން އެއްވެސްތާކަށް އެ ފައިސާ އަނބުރާ ނުހޯދިގެން އުޅޭ ސަބަބެއްވެސް ހާމަކުރަން އެބަ ޖެހޭ ކަމަށް ރައީސް ޔާމީން ވަނީ ވިދާޅުވެ ސުވާލު އުފައްދާފައެވެ.

އެގޮތުން ކުރީގެ ރައީސް ޞާލިހް ހުރިހާކަމަކަށް ވެސް ދެއްވާނީ ޒީރޯ ޓޮލަރެންސްކަމަށް ވިދާޅުވިނަމަވެސް އެމްއެމްޕީއާރްސީ މައްސަލައިގައި އެކަން ކުރައްވާފައިނުވާކަމަށް ރައީސް ޔާމީން ވާހަކައިގައި ފާހަގަކުރެއްވިއެެވެ.

އިންތިޚާބު ދުވަސްވަރު މި ސަރުކާރުން ވެސް އެވާހަކަތައް އަޑުހަރުކޮށް ދެއްކެވިކަމަށާއި މިއަދު އެއްވެސް ވަރަކަށް އެވާހަކަތައް ދައްކަވާ މަންޒަރެއް ނުފެންނަ ކަމަށް ރައީސް ޔާމީން ވަނީ ވިދާޅުވެފައެވެ.