ދައުލަތުގެ ދަރަނި އިތުރުވެ ގައުމު އިންދަ ޖެހެމުންދާ ކަމަށާ އެހެންކަމުން ޚަރަދުތައް ކުޑަކުރަން ޖެހޭ ކަމަށް ސަރުކާރުން ބުނަމުންދާ ނަމަވެސް ބަހާ އަމަލާ އެކަމުގައި ދިމާނުވާކަން ހާމަވެއްޖެއެވެ.

އެގޮތުން ސަރުކާރުގެ ޚަރަދުތައް ނުކަތައިގެން ދައުލަތަށް ބުރަ ބޮޑުވެފައިވާ ކަމަށާ ސިޔާސީ މަގާމުތައް މަދުކުރަން ޖެހިފައިވާ ކަމަށް ރައީސް މުހައްމަދު މުއިއްޒު ވިދާޅުވެފައިވީ ނަމަވެސް އޭގެ ފަހުންވެސް ސިޔާސީ މަގާމުތަކަށް ބޭފުޅުން ގެންދަވަނީ އައްޔަންކުރައްވަމުންނެވެ.

އެގޮތުން އެންމެ ބޮޑަށް ދަރަނިވެފައިވާ ކަމަށް ސަރުކާރުން ބުނަމުން ގެންދާ ކުންފުނި، ފެނަކައަށް އަނެއްކާވެސް މިވަނީ މެނޭޖަރަކު އައްޔަންކޮށްފައެވެ.

މައުލޫމާތު ލިބިފައިވާ ގޮތުގައި މިއަދު ވަނީ ގާދިފުއްފުށި ފެނަކަ ބްރާންޗަށް މެނޭޖަރު އައްޔަންކޮށްފައެވެ. އެ މަގާމަށް އައްޔަންކޮށްފައިވަނީ، އާދިލް އަބްދުﷲ ސާދިގުއެވެ.

މިއަދުން ފެށިގެން އާދިލް ވަޒީފާއަށް ނިކުންނަން ފަށާފައިވާއިރު އެ ރަށުގެ ފެނަކައިގައި އޭނާއާއެކު ތިން މެނޭޖަރަކު ތިބެއެވެ.

އަނެއްވެސް ސިޔާސީ މަގާމަކަށް މީހަކު އައްޔަންކޮށް ސަރުކާރުން މިވަނީ ދައްކާ ވާހަކައިގެ އޮއްޓަރެއް ނެތްކަން ހާމަކޮށްދީފައެވެ. ސަރުކާރުގެ މިފަދަ އަމަލުތަކުގެ ސަބަބުން ރައްޔިތުން ކުރިމަތީ ވެރިންގެ އިތުބާރު ދަނީ ގެއްލެމުންކަން ފާހަގަކޮށްލެވެއެވެ.

ރާއްޖޭގެ މާލީ ހާލަތު ދަށްވެފައިވާތީ ހަރަދު ކުޑަކުރަން ސަރުކާރުގެ ކުންފުނިތަކަށް އަންގާފައިވާއިރު، އިތުރު މުވައްޒަފުން ވެސް ނުނެގުމަށް ވެސް ވަނީ އަންގާފަ އެވެ. ނަމަވެސް ކުންފުނިތަކުން އަދިވެސް ދަނީ އިތުރު މުވައްޒަފުން ނަގަމުންނެވެ. އެއް މަގާމަކަށް ގިނަ މުވައްޒަފުން ވެސް ދަނީ ނަގަމުންނެވެ.