ސަރުކާރުގެ ސިޔާސީ މަގާމްތަކުގައި ތިބި ފަރާތްތަކުގެ އަދަދު ހާމަ ކުރާނެ ކަމަށް ބުނި ނަމަވެސް އަދިވެސް ބުނެދެވިފައިނުވާކަން ހާމަވެއްޖެއެވެ.

މަޖިލީހުގެ ޖަލްސާއަށް އެމްޑީޕީގެ ފަރާތުން ވެސް ވަނީ ދާދި ފަހުން ސިޔާސީ މަގާމްތަކުގެ އަދަދު ހާމަކުރުމަށް ކުއްލި މައްސަލައެއް ހުށަހަޅާފައެވެ.

ނަމަވެސް ސަރުކާރުގެ މެމްބަރުންގެ އަޢުލަބިއްޔަތުން އެ މައްސަލަ ވަނީ ބޭރުކޮށްލާފައެވެ.

އެކަމާ ގިނަ ބަޔަކު ފާޑުކިޔުމުން ސަރުކާރުގެ މެމްބަރުން ބުނީ އެ މައުލޫމާތު ހާމަ ކުރާނެ ކަމަށެވެ. އެ ދުވަހު އެ މައްސަލަ މަޖިލީހުން ބޭރުކޮށްލީ އެމްޑީޕީއިން އެ މައްސަލަ ހުށަހެޅުމުން ކަމަށެވެ.

ނަމަވެސް ފާހަގަކޮށްލެވޭ ގޮތުގައި އެމްޑީޕީން އެ މައުލޫމާތު ހޯދަން އެދުމުގެ ކުރިންވެސް ސަރުކާރު ޖަވާބުދާރީ ކުރުމަށްޓަކައި މަސައްކަތް ކުރާ އެތައް ނޫހަކުން ވަނީ އެ މައުލޫމާތު ހޯދުމުގެ މަސައްކަތް ކޮށްފައެވެ.

ނޫސްވެރިން އެކަމާ ގުޅިގެން ސުވާލުކުރާ ކޮންމެ ފަހަރަކު ރައީސް އޮފީހުގެ އިސްތަރުޖަމާނު ހީނާ ވަލީދު ވިދާޅުވަނީ އެ މައުލޫމާތު ހާމަކުރާނެ ކަމަށެވެ.

ނަމަވެސް ސަރުކާރަށް 7 މަސްވެގެން މިދިޔައީ އެ މައުލޫމާތު ސިއްރުކޮށްގެންނެވެ.

މި ސަރުކާރުން ވެރިކަމަށް އައީ އެއްވެސް ހާލަތެއްގައި ސިޔާސީ މަގާމުތަކުގެ އަދަދު 700 އަށްވުރެ މަތި ނުކުރާނެކަމގެ ވައުދާއެކުގައެވެ.

ނަމަވެސް ފެނިގެންދަނީ ސަރުކާރުގެ ވުޒާރާތަކަށާއި ކުންފުނިތަކަށް ނުކަތާ ވަރަށް މުވައްޒަފުން އައްޔަންކޮށްގެން ރައްޔިތުންގެ ފައިސާއިން މުސާރަ ދެމުންގެންދާ މަންޒަރެވެ.