ދައުލަތުގައި ފައިސާ ނެތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވަމުން ގެންދަވާއިރު އެމަނިކުފާނުގެ ސަރުކާރު ހިއްސާ ކުންފުނިތަކުގެ އަމަލުތަކުން އެކަން ނުފެންނެއެވެ.

ރާއްޖޭގެ މާލީ ހާލަތު ވަރަށް ދަށްވެ ޚަރަދުތައް ކުޑަނުކޮށްފި ނަމަ ލަންކާ ބަނގުރޫޓުވީ ފަދައިން ރާއްޖޭގެ ވެސް ސޮވެރިން ޑިފޯލްޓަކަށް ހިނގައިދާނެކަމަށް ދުނިޔޭގެ މާލީ އިދާރާތަކުން އިންޒާރުދެމުން އަންނަތާ އަހަރު ދުވަސްވަނީއެވެ.

ނިމިދިޔަ އަހަރަކީ ގައުމުގެ ވެރިކަން ބަދަލުވި އަހަރުކަމަށްވާއިރު އޭރު އިދިކޮޅުގައި ތިބެ މިއަދުގެ ވެރިން ވިދާޅުވަމުން ގެންދެވީ އޭރުގެ ވެރިން ރައީސް އަބްދުﷲ ޔާމީންގެ ތަރައްގީގެ އަސްލު އޮޅުވާލަން، ނަން ބޯޑުތައް ބަދަލުކުރުން ފަދަ ކަންކަން ހިންގުމަށްފަހު ބޮޑު މެގާ ޕްރޮޖެލުޓުތައް ނިންމާލީ ކަމަށްބުނެ މެޑަލް ޖަހާފައިވާ ކަމަށެވެ. އަދި އެ ފަދަ ޕްރޮޖެކުޓުތަކަށް ދައުލަތުގެ ބަޖެޓުން ބޭކާރު ފައިސާ ޚަރަދުކޮށްފައިވާ ކަމަށެވެ.

އޭރު ފާޑުކިޔުމަށްފަހު އައިސް މިހާރު ވެރިކަމުގައި ތިބެ މި ބޭފުޅުންވެސް ކުރައްވަނީ ހަމަ އެ މަސައްކަތްކަން ވަނީ ހާމަވެފައެވެ.

އެގޮތުން ރީޖަނަލް އެއާޕޯޓް (އާރުއޭސީއެލް) ގެ ލޯގޯ ޑިޒައިންކޮށްގެން 25،000 ރުފިޔާ ހޯދުމުގެ ފުރުސަތު ހުޅުވާލައިފިއެވެ. އާރުއޭސީއެލް އިން ބުނީ އެ ކުންފުނީގެ ލޯގޯ ޑިޒައިންކޮށްގެން، 25،000 ރުފިޔާ ހޯދުމުގެ ފުރުސަތަކީ، ހަމައެކަނި ދިވެހިންނަށް ހާއްސަކޮށް ހުޅުވާލި ފުރުސަތެއް ކަމަށެވެ. އެގޮތުން އަމިއްލަ ފަރުދަކަވެސް، އަދި ކުންފުންޏެއްގެ ފަރާތުންވެސް ލޯގޯ ޑިޒައިންކޮށް ހުށަހެޅޭނެކަމަށް އެ ކުންފުނިން ބުންޏެވެ.

ލޯގޯ ފަރުމާކުރަންވާނީ ގަދަ ޓާކޮއިޒް ކުލަ ބޭނުންކޮށްގެންކަމަށް އެ ކުންފުނިން ބުނެ އެވެ. އަދި ދެ ވަނަ ކުލައެއްގެ ގޮތުގައި އެ ކުލައިގެ މަޑު ކުލައެއް ނުވަތަ ޝޭޑެއް ބޭނުންކުރެވިދާނެ އެވެ. އާރުސީއެލް އިން ބުނި ގޮތުގައި ލޯގޯ އިން އެއާޕޯޓް ރަމްޒުކޮށްދޭންޖޭނެ އެވެ. އަދި އެ ލޯގޯއިން އެއާލައިނެއް ރަމްޒުވެގެން ނުވާނެކަމަށްވެސް އެ ކުންފުނިން ބުންޏެވެ.

ޑިޒައިންކުރާ ލޯގޯތައް ހުށަހެޅުމުގެ ސުންގަޑިއަކީ މި މަހުގެ 9 ވަނަ ދުވަސް އެވެ. އަދި ޑިޒައިންކުރާ ލޯގޯތައް ހުށަހަޅަންޖެހޭނީ މެއިލް މެދުވެރިކޮށް، ލޯގޯގެ ވެކްޓާ ފައިލްކަމަށް އެ ކުންފުނިން ބުންޏެވެ.

ނަމަވެސް ސުވާލަކީ މިއީ މި ވަގުތަކަށް އަދި މިވަގުތު ގައުމު އޮތް ހާލަތަށްބަލާއިރު މިަފދަ ކަމެއް ކުރުމަށް ހަމަ އެންމެ މުނާސަބާ ވަގުތުބާއެވެ؟

އެއްކޮޅުން އެ ގޮވަނީ ނެތް ނެތެވެ. އަނެއް ކޮޅުން މިއޮއްގެން ޚަރަދުކޮށްލަނީ ސުމާރެއް ނުބަލައެވެ. އެހެންކަމުން ގިނަ ބަޔަކު ގެންދަނީ ސަރުކާރުން އޮޅުވާލަމުންދާކަމުގެ ތުހުމަތު ކުރަމުންނެވެ.