ރިޔާސީ އިންތިހާބުގައި ރައީސް ޑރ މުހައްމަދު މުއިއްޒު ޕްރޮމޯޓު ކުރުމަށް މާ ބޮޑު މަސައްކަތްތަކެއް ނުކޮށް ހަމައެކަނި ފޯނުކޯލެއް ކޮށްލު އަހުމަދު މުބީނަށް އަނެއްކާވެސް ސަރުކާރުން މަގާމެއް ދީފިއެވެ.
ކުރިން އާރުސީއެލްގެ އެމްޑީއަކަށް ހުއްޓާ ޕާފޯމަންސް ދަށްވެ މަގާމުން އިސްތިއުފާދޭން އަންގައިގެން އިސްތިއުފަދިނުމުން ރައީސް މުއިއްޒު އެ ކުންފުނި އުވާލާ އެމްއޭސީއެލްގެ ދަށަށް އެ ކުންފުނީގެ މަސްއޫލިއްޔަތު ގެނައެވެ.
އޭގެ ފަހުން މުބީނަށް މަގާމެއް ނުދީ 10 މަސް ދުވަހު ބެހެއްޓުމަށް ފަހު ރައީސް މުއިއްޒުގެ ސަރުކާރުން ވަނީ އެމްޓީޓީސީގެ ޑީއެމްޑީގެ މަގާމަށް އައްޔަންކޮށްފައެވެ.
އެމްޓީސީސީން ނެރުނު ބަޔާނެއްގައި ބުނެފައިވަނީ، ކުންފުނީގެ މެނޭޖްމަންޓަށް ގެނެވުނު މި އާ ބަދަލާއެކު، ކުންފުނީގެ ހިންގުން އިތުރަށް ހަރުދަނާވެ، ކުރިއެރުންތަކެއް ލިބިގެންދާނެ ކަމަށް އުންމީދުކުރާ ކަމަށެވެ.
މުބީންގެ ކުރިން ޑީއެމްޑީގެ މަގާމުގައި ހުންނެވީ އަހުމަދު ޝަރީފް އަބްދުއްރަހްމާން ޔޫސުފް އެވެ. ނަމަވެސް އޭނާ ވަނީ މިދިޔަ މަހު އިސްތިއުފާ ދެއްވައިފައެވެ.
މުބީން އެމްޓީސީސީގެ ޑީއެމްޑީގެ މަގާމަށް އައްޔަނުކުރެއްވި އިރު ސަރުކާރާއި ކުންފުނިތަކުގެ އިސް ވެރިންގެ މަގާމުތަކަށް ބޮޑެތި ބަދަލުތައް ދަނީ ގެންނަމުންނެވެ.
