ޙިޖުރީ އައު އަހަރުގެ ތަހުނިޔާ ރައީސް އަބްދުﷲ ޔާމީންގެ ދެ ކަނބަލުން އަރިސްކުރައްވައިފިއެވެ.
ޙިޖުރީ ގޮތުން 1446 ވަނަ އަހަރު ފެށުމުގެ މުނާސަބާގެ ތަހުނިޔާއާ މުބާރިކު ބާދީ އަރިސްކުރައްވާ ރައީސް ޔާމީން ދިވެހި ރައްޔިތުންނަށް ފޮނުއްވި މެސެޖުގައި ވިދާޅުވީ، ގައުމު ހަމަ މަގަށް އެޅުވޭނީ ވެރިން ޒިންމާ ދާރުކުރުވައިގެން ކަމަށާ އެހެންކަމުން ޕާޓިއަކަށް ސިޔާސީ ފިކުރަކަށް ނުބައްލަވާ ނިކުމެ ހުރިހާ ރައްޔިތުންވެސް ސަރުކާރު ޖަވާބުދާރީ ކުރުވަން ޖެހޭ ކަމަށެވެ.
މީގެ އިތުރުން ކަންކަން ރަގަޅުކުރުމުގެ ވައުދާއެކު އައި ސަރުކާރުގެ އަމަލުތަކަށް ފާރަވެރިވުމަށް ރައީސް ޔާމީން ވަނީ ދިވެހި ރައްޔިތުންނަށް އިލްތިމާސްކުރައްވައިފައެވެ.
ޤައުމީ މަޞްލަޙަތަށްވުރެ އަމިއްލަ މަޞްލަޙަތު އިސްނުކުރުމަށް މެސެޖުގައި އެމަނިކުފާނުވަނީ އިލްތިމާސް ކުރައްވާފައެވެ.
ހިޖުރީ އައު އަހަރަކާ ކުރިމަތިލާއިރު އިސްލާމީ އުއްމަތަށް މިއަދު ކުރިމަތިވެފައިވާ ގޮންޖެހުންތަކާއި ނުރައްކާތަކުގެ މަތިން ހަނދާންކޮށް ޚާއްސަކޮށް ފަލަސްތީނުގެ ރައްޔިތުންނަށް ކުރިމަތިކުރުވަމުން ގެންދާ އަނިޔާއިން އެ މުސްލިމު އަޚުންނާ އުޚުތުން ސަލާމަތްކޮށްދިނުމަށް އެދި ދުއާ ކުރުމަށް ވެސް އެމަނިކުފާނު އިލްތިމާސްކުރައްވާފައެވެ.
