އަމިއްލަ ޕާޓީގެ ވެރިކަމުގައި ރައްޔިތުންނަށް ފްލެޓު ނުދީ ލަސްކުރި އެމްޑީޕީއިން މި ސަރުކާރުން ފްލެޓު ދިނުން ލަސްކުރާތީ ފާޑުކިޔައިފިއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަމުން އެމްޑީޕީގެ ކުރީގެ ރައީސް ޑރ. އިބްރާހިމު ދީދީ ވަނީ މި ސަރުކާރުގައި ފްލެޓުތައް ދޫކުރުމުގައި ލަސްވާ ލަސްވުމަށް ފާޑުކިޔާފައެވެ.
އެގޮތުން އޭނާ ބުނެފައިވާ ގޮތުގައި ވެރިކަމަށް 8 މަސްވާއިރު، ފްލެޓުތައް ޙަވާލުކޮށް ނުލެވުނީމާ މި ސަރުކާރުން ރައްޔިތުންނާމެދު އޯގާތެރިކަމެއް ނެތްކަން އެނގިގެންދާކަމެއް ކަމަށެވެ. އަދި ފްލެޓު ލިބިފައިވާ އެތައް ބަޔަކު މިހާރުވެސް ވަރަށް ދަތި، ނިކަމެތި ހާލުގައި އުޅެމުންދާއިރު މި ސަރުކާރުން ފްލެޓު ދިނުން އަވަސްކުރުމަށް މަސައްކުަތްކުރަމުން ދާ މަންޒަރު ނުފެންނަ ކަމުގެ ތުހުމަތުވެސް ޑީޑީ ކޮށްފައިވެއެވެ.
މީގެ އިތުރުން ނިމިދިޔަ އެމްޑީޕީ ސަރުކާރުގައި އެޅި ފްލެޓުތަކުގެ ޖާގަ ތަނަވަސްކަމަށް މި ސަރުކާރުގެ ހައުސިން މިނިސްޓަރު ވެސް އެއްބަސްވެފައިވާއިރު ރައްޔިތުންނަށް ލުއި ފަސޭހަ ލިބޭނެ ކަމެއްގައި ލަސްކުރުމަކީ ބަލައިގަނެވޭނެ ކަމެއް ނޫން ކަމަށްވެސް ޑީޑީ ވަނީ ބުނެފައެވެ.
ފްލެޓުގެ ޙައްޤުވެރިންނަށް އެތަންތަން 8 މަސް ވެގެންދާއިރު، ފޯރުކޯށްނުދެވުމުން ރައްޔިތުންނާމެދު އެއްވެސް ކަހަލަ އޯގާތެރިކަމެއް، އެއްވެސް ކަހަލަ އިހުލާސްތެރިކަމެއް މި ސަރުކާރުގައި ނެތްކަން ހާމަވާ ކަމަށް ވެސް ޑީޑީ ބުނެފައިވެއެވެ.
ނިމިދިޔަ ސަރުކާރުން ވެރިކަން ނިމެން އުޅެނިކޮށް އެޅި ފްލެޓުތަކުގެ ތެރޭގައި ހިމެނޭ ގެދޮރުވެރިޔާ ފްލެޓުތައް ދޫކުރެވޭނެ ވަކި ތާރީޚެއް ނޭނގޭ ކަމަށް މި ސަރުކާރުން ކުރިން ހާމަކޮށްފައިވެއެވެ.
