މާރިޗް މަހު ބާއްވާ ރައްޔިތުންގެ މަޖިލީހުގެ އިންތިހާބު އޮބްޒާވް ކުރުމަށް ރާއްޖެއިން ބޭރުގެ 30 ފަރާތަކަށް އިލެކްޝަން ކޮމިޝަނުގެ ހާއްސަ ދައުވަތު ފޮނުވަން ފަށައިފިއެވެ.

ދަރުބާރުގޭ ހިރިޔާ މާލަމުގައި ބޭއްވި މަޖިލިސް އިންތިހާބުގެ ޤައުމީ ލަފާދޭ ކޮމިޓީގެ ދެ ވަނަ ބައްދަލުވުމުގައި ވާހަކަފުޅު ދައްކަވަމުން އީސީގެ ނައިބު ރައީސް އިސްމައިލް ހަބީބް ވިދާޅުވީ ކުރިއަށް އޮތް މަޖިލިސް އިންތިހާބު އޮބްޒާވް ކުރުމަށް ރާއްޖޭގެ އިތުރުން ބޭރުގެ އޮބްޒާވަރުންނަށްވެސް އެ ފުރުސަތު ހުޅުވާލާފައިވާ ކަމަށެވެ.

އެގޮތުން އީސީގެ ހާއްސަ ދައުވަތެއް ބޭރުގެ 30 ފަރާތަކަށް ފޮނުވާނެކަމަށް ހަބީބް ވިދާޅުވިއެވެ.

ހަބީބް ވިދާޅުވީ މި ބޭފުޅުންގެ ތެރެއިން 10 ބޭފުޅުންނަކީ ބައިނަލްއަޤުވާމީ ޖަމިއްޔާ ޖަމާއަތްތަކުން ހޮވާލެވޭނެ ބޭފުޅުން ކަމަށެވެ. އަދި މި އިންތިހާބު އޮބްޒާވް ކުރުމަށް ބޭނުންވާ ހުރިހާ ފަރާތްތަކަށް އެ ފުރުސަތު އެބައޮތް ކަމަށާއި ޝަރުތުތައް ފުރިހަމަވާ ފަރާތްތަކުން ރަޖިސްޓްރީކުރުމަށްފަހު ރާއްޖެ ވަޑައިގެން އޮބްޒާވްކުރުމުގެ ފުރުސަތު ހުޅުވާލެވިފައިވާ ކަމަށް ހަބީބް ވަނީ ވިދާޅުވެފައެވެ.

އީސީގެ ހާއްސަ ދައުވަތުލިބޭ ޤައުމުތަކުގެ ތެރޭގައި ސައުތު ކޮރެޔާ، ޖަޕާން، އޮސްޓްރޭލިޔާ، ފިލިޕީންސް، ކެމްބޯޑިޔާ އަދި އިންޑިޔާވެސް ހިމެނެއެވެ.