މި ސަރުކާރުން ބަލަން ޖެހޭނީ ހަމައެކަނި އެމްއެމްޕީއާރްސީ ހިޔާނާތުގެ މައްސަލަ ނޫންކަމަށާއި މައްސަލަތައް ބަލާނަމަ ހުރިހާ ކޮރަޕްޝަނެއްގެ މައްސަލަތައް ބެލެވެންވާނެ ކަމަށް ޕީއެންއެފްގެ މެމްބަރު ހަލީމަތު ޒުހައިރާ ވިދާޅުވެއްޖެެއެވެ.

ހަލީމަތު މިފަދައިން ވިދާޅުވެފައިވަނީ އޭނާގެ ފޭސްބުކް ޕޯސްޓެއްގައެވެ.

އެމްއެމްޕީއާރްސީގެ ބޮޑު ހިޔާނާތުން ގެއްލުނު ހުރިހާ ފައިސާއެއް ހޯދައި އެ ވައްކަމުގައި ކޮންމެ މީހަކު ބައިވެރިވެފައި އޮތަސް އެމީހަކަށް އަދަބު ދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ޕީއެންސީ ޖަގަހައިގައި އޮތް ޖަލްސާގައި ވަނީ ވިދާޅުވެފައެވެ.

އެކަމަށް ރައްދު ދެއްވަމުން ހަލީމަތު ވިދާޅުވީ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރުމުގެ ނިޔަތެއް އޭރުގައި ވެސް އަދުގެ ސަރުކާރުގެ ވެރިންގެ ނެތްކަން މިއަދު ސާފުވެއްޖެކަމަށެވެ.

ރައީސް ޑރ މުއިއްޒު އެމްއެމްޕީއާރްސީ މައްސަލަ ބަލާނެ ކަމަށް ވިދާޅުވިއިރު، ކުރީ ސަރުކާރުން ހިންގި ބޮޑު އެއް ޖަރީމާ ކަމަށްވާ، ވެންޓިލޭޓާރުތަކުގެ ވައްކަމާ، އެމްޑީއެން ރިޕޯޓާ، އިންޑިޔާ އައުޓް ގަރާރްގެ ވާހަކަޔާއި ފެނަކަ ކޮރަޕްޝަންގެ މައްސަލަތައް ވެސް ބެލުން މުހިންމު ކަމަށް ހަލީމަތު ވިދާޅުވިއެވެ.

އޭގެއިތުރުން އެމްއެމްޕީއާރްސީ މައްސަލަ ބަލައިގެން ރައީސް ޔާމީން ފްރޭމް ކުރައްވަން އުޅުއްވަނީ ސަރުކާރު ޖަވާބުދާރީ ކުރަން މަސައްކަތް ކުރާތީތޯ އައްސަވާ ހަލީމަތު ވަނީ ރައީސް މުއިއްޒަށް ސުވާލު އަމާޒުކުރައްވާފައެވެ.

ރައީސް ޔާމިންގެ އަނގަމަތީ ޓޭޕް އަޅުއްވަން މަސައްކަތް ކުރަނީކަމަށް ތުހުމަތު ކުރައްވާ ހަލީމަތު ވަނީ ރައީސް މުއިއްޒަށް ފާޑުވިދާޅުވެފައެވެ.

ވެރިކަމާ ހަވާލުވެވަޑައިގަތުމުގެ ކުރިން ރައީސް މުއިއްޒު ވަނީ ކުރީ ސަރުކާރުން ހިންގި ކޮރަޕްޝަންތަކުގެ މައްސަލަތައް ތަހުގީގު ކުރައްވާނެކަމަށް ވިދާޅުވެފައެވެ.

ނަމަވެސް ވެރިކަމަށް އައުމަށްފަހު އެއިން އެއްވެސް ވާހަކައެއް އެމަނިކުފާނު ދައްކަވާފާއިނުވާކަން ފާހަގަކޮށްލެވެއެވެ.