ޚަރަދު ކުޑަކުރުމަށް އެކި ފިޔަވަޅުތައް އަޅުއްވަން ނިންމަވާފައިވާ ކަމަށް ސަރުކާރުން ބުނަމުން އަންނައިރު އަދިވެސް ފެންނަނީ ދައުލަތުގެ ޚަރަދުން ބޮޑެތި އިސްރާފުތައް ކުރަމުން އަންނަތަނެވެ.
މިގޮތުން، އިކޮނޮމިކް މިނިސްޓަރ މުހައްމަަދު ސައީދު ވަނީ ގުޅުން ބަދަހި ކުރުމުގެ ނަމުގައި އެމެރިކާއަށް ވަޑައިގަންނަވާފައެވެ.
ރާއްޖޭގެ އިޤްތިސާދީ ހާލަތު އެންމެ ބޮޑަށް އެގިވަޑައިގަންނަވާނެ ވަޒީރު، މާލީ ހާލަތު ދަށްވެފައިވާ ދުވަސްކޮޅެއްގައި މިފަދަ ރަސްމީ ދަތުރުފުޅުތައް ކުރެއްވުމަކީ ސަރުކާރުން ދައްކަވަމުންދާ ވާހަކަތަކަކީ ދޮގު ކަން ހާމަވާ ކަމެކެވެ. މިއާއިއެކު ސުވާލު އުފެދޭ ކަމަކީ ގައުމުގެ މާލީ ހާލަތު އެބުނާ މިންވަރަށް ދަށަށް ގޮސްފިތޯއެވެ؟ އެހެންކަމަށްވަނީނަމަ ސަރުކާރުގެ ރަސްމީ ދަތުރުތަކާއި، ސިޔާސީ ވަޒީފާތައް އިތުރުކުރުމަކީ ކޮން ސިޔާސަތެއްގެ ދަށުން ކުރައްވަމުން ގެންދަވާ ކަމެއްތޯ ގިނަ ބަޔަކު އަންނަނީ ސުވާލު އުފައްދަވަމުންނެވެ.
މީގެ އިތުރުން، ސިޔާސީ މަގާމުތައް މަދުކުރައްވާނެ ކަމަށް ހާމަކޮށްފައިވާއިރު އަދިވެސް އަންނަނީ އެކި ވުޒާރާތަކަށް ސްޓޭޓް މިނިސްޓަރުން އައްޔަނުކުރަމުންކަން ފާހަގަކުރެވެއެވެ. މި ނޫންވެސް ދައުލަތުގެ މާލިއްޔަތުން ބޮޑެތި ޚަރަދުތައް ކުރައްވަމުން އަންނައިރު، ޚަރަދު ކުޑަކުރަން ޖެހެނީ ހަމައެކަނި ނިކަމެތި ރައްޔިތު މީހާތޯވެސް ސުވާލު އުފެދެއެވެ.
