ސިޔާސީ ގިނަ މަގާމުތަކާއި ސަރުކާރު ހިއްސާވާ ކުންފުނިތަކަށް ހައްދެއް ނެތި މުވައްޒަފުން އިތުރުކޮށް ސަރުކާރު ކުންފުނިތަކުގެ އާދައިގެ މަގާމުތަކުގައި ވަޒީފާ އަދާކުރާ މުވައްޒަފުން ވަޒީފާއިން ވަކިކުރަމުންދާތީ އެކަން ހުއްޓުވުމަށް ގޮވާލާ ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ސަރުކާރުގެ މެޖޯރިޓީ އޮތް މަޖިލީހުން ބޭރުކޮށްލައިފިއެވެ.

މަޖިލީހުގެ މިއަދުގެ ޖަލްސާއަށް ކުއްލި މައްސަލަ ހުށަހެޅުއްވީ ކެންދޫ ދާއިރާގެ މެންބަރު މައުރޫފް ޒާކިރުއެވެ.

ކުއްލި މައްސަލައަށް ބަހުސް ކުރަން ނުފެންނަ ކަމަށް 57 މެންބަރުން ވޯޓު ދެއްވިއިރު ބަހުސްކުރަން ފެންނަ ކަމަށް ވޯޓު ދެއްވީ 12 މެންބަރުންނެވެ.

މައްސަލައިގައި ވަނީ ރައީސް ޑރ. މުހައްމަދު މުއިއްޒު މިދިޔަ ޖޫން 27 ވަނަ ދުވަހުގެ ރޭ އެކްސްގައި ކުރެއްވި ޕޯސްޓެއްގައި ސަރުކާރުގެ ހަރަދުތައް ކުޑަކުރުމަށް ގިނަ ފިޔަވަޅުތަކެއް އަޅަން ނިންމާފައިވާ ކަމަށް ވިދާޅުވެފައިވާތީ އެކަން ފާހަގަކުރައްވާފައެވެ.

މި ސަރުކާރުގައި ސިޔާސީ މަގާމުތަކުގެ އަދަދު 700 އިން ދަށުގައި ހިފެހެއްޓުމަކީ މި ސަރުކާރުގެ ވައުދެއް ނަމަވެސް އެ އަދަދު އެއަށްވުރެ އިތުރު ކަމަށް މީހުން ބުނަމުންދާ ކަމަށް މައުރޫފް ވިދާޅުވިއެވެ.

މީގެ އިތުރުން ރައީސް މުހައްމަދު މުއިއްޒު މަގާމުގެ ބާރު ނަހަމަ ގޮތުގައި ބޭނުންކުރަމުން ގެންދާކަމުގެ ތުހުމަތު ވެސް މައުރޫފުކޮށްފައިވެއެވެ.

އެގޮތުން ރައީސުލްޖުމްހޫރިއްޔާގެ މަގާމުގެ ވާޖިބު އަދާކުރުމަށްޓަކައި ބޭނުންވާ މަގާމުތަކަށް މީހުން އައްޔަންކުރުމުގެ ބާރު ގާނޫނު އަސާސީން ރައީސަށް ދީފައިވީ ނަމަވެސް އެ ބާރުގެ ބޭނުން ނާޖާއިޒު ގޮތުގައި ހިފަމުންދާ ކަމަށް މައުރޫފު ތުހުމަތުކުރެއްވިއެވެ.


ހަމައެހެންމެ މައުލޫމާތު ހޯދާ ލިބިގަތުމުގެ ގާނޫނަށް ވެސް ސަރުކާރުން ހުރަސް އަޅާ އެއްބާރުލުން ނުދޭކަން ވެސް ކުއްލި މައްސަލަ ހުށަހަޅަމުން މައުރޫފު ފާހަގަކުރައްވާފައިވެއެވެ.

އެގޮތުން މައުރޫފު ވަނީ ސިޔާސީ މަގާމުތަކަށާއި ސަރުކާރު ހިއްސާވާ ކުންފުނިތަކަށް އިތުރުކޮށްފައިވާ މުވައްޒަފުންނާއި ހޭދަވާ މުސާރައިގެ ސާފުކުރަން މަޖިލީހުގެ މާލިއްޔަތު ކޮމިޓީން ފިނޭންސް މިނިސްޓްރީގައި އެދުމުން އެ މައުލޫމާތު ދޭން އިންކާރުކޮށްފައިވާ ކަމަށެވެ.

މައުރޫފް ވިދާޅުވީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ ހަރަދު ކުޑަކުރުމަށް އަޅާ ފިޔަވަޅުތަކުގެ ތެރެއިން އެތައް މުވައްޒަފުންނެއް ވަޒީފާއިން ވަކިކޮށް މިމަހުގެ ހަތަރުވަނަ ދުވަހު މެމޯ ފޮނުވާފައިވާ ކަމަށެވެ. ނަމަވެސް ހަމަ އެ ދުވަހު 35،000 ރުފިޔާއަށްވުރ ބޮޑު މުސާރައާއެކު ދެ ކޮންސަލްޓެންޓުން އެ ކުންފުންޏަށް ނަގާފައިވާކަންވެސް ފާހަގަކުރައްވާފައެވެ.

މީގެ އިތުރުން މިފްކޯގެ ކޫއްޑޫ ފިޝަރީޒް ކޮމްޕްލެކްސް އިން ފާއިތުވި ހަފުތާގައި އެކަނިވެސް އެތައް މުވައްޒަފުން ވަޒީފާއިން ވަކިކޮށްފައިވާ ކަމުގެ ޝަކުވާ ލިބިފައިވާ ކަމަށް މައުރޫފް ވިދާޅުވިއެވެ.

މައުރޫފް ހުށަހެޅުއްވި ކުއްލި މައްސަލައިގައި ވަނީ ސަރުކާރު ހިއްސާވާ ކުންފުނިތަކަށް ބޮޑެތި މުސާރައިގައި ހައްދެއް ނެތި މީހުން އައްޔަންކުރުމާއި ސަރުކާރުގެ އިދާރާތަކުގެ ސިޔާސީ މަގާމުތަކަށް މީހުން އައްޔަންކުރުން ހުއްޓާލުމަށް ގޮވާލާފަ އެވެ. މީގެ އިތުރުން އާދައިގެ މަގާމުތަކުގައި ވަޒީފާ އަދާކުރާ މުވައްޒަފުން ވަކިކުރުން ހުއްޓާލައި މިހާތަނަށް ވަޒީފާއިން ވަކިކޮށްފައިވާ މީހުންގެ ވަޒީފާ އިއާދަކޮށްދިނުމަށް ގޮވާލާފައެވެ.