ރައްޔިތުންގެ މަޖިލީހުގެ އިންތިޚާބު އޮންނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައިދިނުމަށް ރައީސުލްޖުމްހޫރިއްޔާއަށް ދަންނަވާފައިވާނެ ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ.

ހަބީބް މިހެން ވިދާޅުވީ ރައްޔިތުންގެ މަޖިލީހުގެ އިންތިޚާބުގެ ގައުމީ ލަފާދޭ ކޮމިޓީގެ ބައްދަލުވުމުގައި ވާހަކަދައްކަވަމުންނެވެ.

އެގޮތުން އެ ބައްދަލުވުމުގައި މަޖިލިސް އިންތިޚާބު ބާއްވާ ދުވަހަކީ ރަސްމީ ދުވަހަކަށްވާތީ ވޯޓުލާން ނިކުންނަ މީހުންގެ އަދަދު މަދުވެދާނެ ކަމަށް ވިދާޅުވެ އިންތިޚާބުގެ ލަފާދޭ ކޮމިޓީގެ ބައެއް މެންބަރުން ވަނީ ކަންބޮޑުވުން ފާޅުކުރައްވާފައެވެ.

އެހެން ކަމުން އެ ކަންބޮޑުވުންތަކަށް އިޝާރާތްކޮށް ހަބީބް ވިދާޅުވީ އިންތިޚާބު އޮންނަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައިދިނުމަށް ރައީސުލްޖުމްހޫރިއްޔާއަށް ދަންނަވާފައި ވާނެކަމަށެވެ.

ކުރިއަށް އޮތް މަޖިލިސް އިންތިޚާބު ބާއްވަން ހަމަޖެހިފައިވަނީ އަންނަ މާޗު މަހުގެ 17 ވާ އާދީއްތަ ދުވަހުއެވެ.