އުސޫލާ ގަވާއިދުގެ ތެރެއިން 39 މުވައްޒަފުން ވަކިކޮށްފައިވާނެކަމަށް މޯލްޑިވިސް އިންޑަސްޓްރިއަލް ކޮމްޕެނީ ލިމިޓެޑް މިފްކޯއިން ހާމަކޮށްފިއެވެ.
މިފްކޯއިން މުވައްޒަފުން ކަނޑަމުންދާކަމަށް ބައެއް މީޑިޔާތަކުގައި ރިޕޯޓުކޮށްފައިވާތީ އެކަމާ ގުޅިގެން ތޭރަ އޮންލައިންއިން ކުރި ސުވާލަކަށް ޖަވާބު ދެއްވަމުން މިފްކޯގެ މީޑީޔާއާ ހަވާލުވެގެން ހުންނެވި އެ ކުންފުނީގެ ޑީއެމްޑީ އިބްރާހިމު ސައީދު (ކޭޑް) ވިދާޅުވީ، މުވައްޒަފުން ވަކި ކުރަމުން ދާ ކަމަށާ އޭގެ ތެރޭގައި ހިމެނެނީ ހާޒިރީއަށް ފަރުވާ ކުޑަ، ވާނުވާ ނާންގައި ގިނަ ދުވަސްތަކެއް ވަންދެން ހާޒިރު ނުވާ މުވައްޒަފުންކަމަށެވެ.
ކޭޑް މިފަދައިން ވިދާޅުވެފައިވާއިރު، މިފްކޯގެ ބައެއް މުވައްޒަފުން ބުނީ ވަކި ކުރީ ކޫއްޑޫގައި ވަޒީފާ އަދާކުރާ މުވައްޒަފުން ކަމަށާއި، މިހާތަނަށް ވަކިކުރި މުވައްޒަފުންގެ އަދަދު 39 އަށް ވުރެ ގިނަ ވާނެ ކަމަށެވެ. އަދި މުވައްޒަފުންނަކީ ހާޒިރީ ރަގަޅު މުވައްޒަފުން ނަމަވެސް ފަރުވާ ކުޑަކަމަށް ބުނެ ވަޒީފާއިން ވަކި ކުރަނީ ނޯޓިހަކާވެސް ނުލާ ކަމަށެވެ.
ސަރުކާރުގެ ކުންފުނިތަކުން މުވައްޒަފުން މަދުކުރާއިރު، އިންތިހާއަށް ގިނަވެފައިވާ ސިޔާސީ މުވައްޒަފުންގެ އަދަދު މަދެއް ނުވެއެވެ.
