މެއި މަހުގެ ދެވަނަ ދުވަހާ ހަމައަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އަށް 39 ސިޔާސީ މުވައްޒަފުން އައްޔަނު ކޮށްފައިވާކަން ހާމަވެއްޖެއެވެ.

މިކަން ހާމަވެފައިވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން ހޯދި މައުލޫމާތުތަކާ ގުޅިގެން މިނިސްޓްރީއިން ދިން މައުލޫމާތުންނެވެ.

އެގޮތުން ނޮވެމްބަރު 17, 2023 އިން މެއި 1, 2024 އާ ހަމައަށް އެ މިނިސްޓްރީއަށް އައްޔަން ކުރި 39 ސިޔާސީ މުވައްޒަފުންގެ މުސާރައަށް މަހަކު އެއް މިލިއަން ރުފިޔާ އަރަ އެވެ.

ފިޝަރީޒް މިނިސްޓްރީން ވަނީ އެ މުއްދަތުގައި އައްޔަންކޮށްފައިވާ ސިޔާސީ މުވައްޒަފުންގެ ތަފުސީލު ދީފަ އެވެ.

ފިޝަރީޒް މިނިސްޓްރީގެ ސިޔާސީ މަގާމުތަކުގެ އަދަދާއި ލިބޭ މުސާރައިގެ ތަފްސީލަކީ:

• މިނިސްޓަރަށް - 58,500ރ.

• ދެ ސްޓޭޓް މިނިސްޓަރުންނަށް - މީހަކަށް 43,500ރ

• 12 ޑެޕިއުޓީ މިނިސްޓަރުންނަށް - މީހަކަށް 378،000ރ.

• 13 ސީނިއާ ޕޮލިޓިކަލް ޑިރެކްޓަރުންނަށް - މީހަކަށް 331،500ރ. އެވެ.

މި އަދަދުތަކަށް ބަލާއިރު ފިޝަރީޒް މިނިސްޓްރީގެ ސިޔާސީ މުވައްޒަފުންގެ މުސާރަ ދިނުމަށް މަހެއްގެ މައްޗަށް 1،080،500ރ. (އެއް މިލިއަން އަށްޑިހަ ހާސް ފަސް ސަތޭކަ ރުފިޔާ) ހޭދަވެއެވެ. އެއީ، އަހަރެއްގެ މައްޗަށް 12,966,000ރ. (12 މިލިއަން ނުވަ ލައްކަ ފަސްދޮޅަސް ހަ ހާސް ރުފިޔާ)އެވެ.

އެހެންކަމުން ފިޝަރީޒް މިނިސްޓަރީގެ ސިޔާސީ މުވައްޒަފުންނަށް މަހެއްގެ މައްޗަށް ހަރަދު ކުރާ ފައިސާއިން 135 ސިވިލް ސާވަންޓުންނަށް މުސާރަ ދެވޭނެއެވެ.

މި ސަރުކާރުން ވެރިކަމަށް އައީ 700 ވުރެ ސިޔާސީ މަގާމުތައް އިތުރުނުކުރާނެކަމަށް ބުނަމުން ނަމަވެސް ވެރިކަމަށް އައިސް މިވީ 8 މަހެއްހާ ދުވަސްތެރޭގައި ސިޔާސީ މުވައްޒަފުންގެ އަދަދު 2000 ގާތް ކުރާކަމަށް މައުލޫމާތު ލިބިފައިވެއެވެ. ސިޔާސީ މަގާމުތަކުގެ ތަފްސީލު ހޯދުމަށް ނޫސްވެރިން އެދުމުން ސަރުކާރުން ދަނީ ތަކުރާރުކޮށް ސިޔާސީ މުވައްޒަފުންގެ އަދަދު ހާމަކުރުން ފަސްކޮށް އެކަމާ ދެކޮޅު ހަދަމުންނެވެ.