ގައުމުގައި އޮންނަ މައި ދެ އިންތިހާބު އެއްކޮށްލުމަށް ސަރުކާރުން ފޫގަޅައިގެން އުޅެނީ ހަރަދުކުޑަކުރަން ނޫން ކަމަށާ ހަރަދު ކުޑަ ކުރާނަމަ ފަށަން ވާނީ ގައިދަށުން ކަމަށް ކުރިގެ ހޯމު މިނިސްޓަރު އުމަރު ނަސީރު ވިދާޅުވެއްޖެއެވެ.
ޗެނަލް13 ގެ ނިއުސް ޓޯކު ޕްރޮގްރާމުގައި ވާހަކަ ދައްކަވަމުން އުމަރު ވިދާޅުވީ އިންތިހާބު އެއްކޮށްލުމުގައި އޭނާގެ މައްސަލައެއް ނެތް ކަމަށާ ނަމަވެސް އެއްކޮށްލުމަށް ގެންގުޅޭ އުޒުރު ނުވަތަ ދއްކާ ބަހަނާ ގަބޫލުކުރަން ދަތި ކަމަށެވެ.
އެގޮތުން ހަރަދު ކުޑަކުރުމުގެ ނަމުގައި އެ ދައްކަނީ ބަހަނާ ކަމަށާ ހަރަދު ކުޑަކުރަން ސަރުކާރުގެ ހެޔޮ ތެދުވެރި ނިޔަތެއް އޮތް ނަމަ އެތައް ހާހުން މައްޗަށް ގޮސްފައިވާ ސިޔާސީ މަގާމުތައް މަދުކޮށް މުސާރައަށް ކުރަމުންދާ ހޭދައިން އެތައް މިލިއަނެއްގެ ފައިސާ ސަލާމާތް ކުރެވޭނެ ކަމަށް އުމަރު ވިދާޅުވެފައިވެއެވެ.
އުމަރު ވަނީ މި ސަރުކާރުން ގައުމުގެ ހަރު މުދާ ވިއްކާ ވިކުމަށްވެސް ފާޑުވިދާޅުވެފައެވެ. އެގޮތުން އުމަރު ވިދާޅުވީ ގައުމުގެ ހަރު މުދާ ވިއްކާނީ ނޭފަތު ކުރިއާ ހަމައަށް ގައުމުގެ ކަންކަމުގައި ވިސްނުން ގެންގުޅޭ ވެރިން ކަމަށެވެ.
