ރާއްޖޭގެ ވެރިކަމުގެ ނިޒާމު އޮތީ ހަރަދު ބޮޑު އަދި އެ ނިޒާމުން އެންމެ ރަނގަޅު ނަތީޖާއެއް ނުކުންނަ ގޮތަކަށް ނޫން ކަމަށާއި އެހެންކަމުން އެކަމާ މެދު ވިސްނައި ނިޒާމަށް ބަދަލުތަކެއް ގެންނަން ޖެހިފައިވާ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެއްޖެއެވެ.

ނާޒިމް މިފަދައިން ވިދާޅުވެފައިވަނީ މަޖިލީހުގެ މެމްބަރުންނަށް އަމާޒުކޮށްގެން ވެސްޓްމިންސްޓަ ފައުންޑޭޝަން ފޯ ޑިމޮކްރަސީން ކުރިއަށް ގެންދާ މަސައްކަތު ބައްދަލުވުން ފެށުމަށް ބޭއްވި ރަސްމިއްޔާތުގައެވެ.

ނާޒިމް ވިދާޅުވީ ފެހި ގާނޫނުއަސާސީގެ ހިޔާވަހިކަމުގައި 2008 ވަނަ އަހަރުން ފެށިގެން ރާއްޖެ 15 އަހަރު ވޭތުކޮށްފައިވާއިރު އެ ތަންފީޒުކުރުމުގައި ކާމިޔާބީ ހާސިލުކޮށްފައިވާ ވަރާއި ދައުލަތުން ކޮށްފައިވާ ހޭދައާ މެދު ވިސްނަން ޖެހޭ ކަމަށެވެ.

ނާޒިމް ވިދާޅުވީ ރާއްޖޭގެ މިއަދުގެ ހާލަތަށް ބަލައި މާލީ ޒިންމާދާރުކަން ކަށަވަރުކުރުން މުހިންމު ކަމަށާއި އެކަމަށް އަޅަންޖެހޭ ބައެއް އިސްލާހީ ފިޔަވަޅުތައް އެބަހުރި ކަމަށެވެ.

ނާޒިމް މިފަދައިން ފާހަގަކުރައްވާފައި ވީނަމަވެސް ފެނިގެންދަނީ ސަރުކާރުން ހަރަދުތައް ކުޑަކުރުމަށް މަސައްކަތެއް ނުކުރައްވާ މަންޒަރެވެ.