ޣައްޒާއާއި މިސްރު ގުޅޭ ރަފަހްގެ ސަރަހައްދީ ރޮނގުގެ ކޮންޓްރޯލު ބޭނުންވާ ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ.

އޭނާ މިފަދައިން ބުނެފައިވަނީ، އިސްރާއީލުން ފަލަސްތީނުގެ ޣައްޒާގައި ކުރަމުންދާ ހަނގުރާމަ ހުއްޓައިލުމަށް ގަތަރުގައި ކުރިއަށް ގެންދިޔަ މަޝްވަރާތައް ނިންމާލުމަށް ފަހު އެނބުރި ގައުމަށް ދިއުމަށް ފަހު ނޫސްވެރިންނާ ބައްދަލުކޮށެވެ.

ޣައްޒާއާއި މިސްރު ގުޅޭ ރަފަހްގެ ސަރަހައްދީ ރޮނގުގެ ކޮންޓްރޯލު ބޭނުންވަނީ ދާއިމީކޮށް ކަމެއް ނުވަތަ ނޫން ކަމެއް ނަތަންޠާހޫ ހާމަކޮށްފައި ނުވި ނަމަވެސް އޭނާ ބުނެފައިވާ ގޮތުގައި އެ ގޮތަށް ޑިމާންޑުކުރަނީ މިސްރުން ޣައްޒާގެ ވެރިކަންކުރާ ހަމާސް ޖަމާއަތަށް ހަތިޔާރު ފޯރުކޮށްދިނުން ހުއްޓުވުމުގެ ގޮތުން ކަމަށެވެ.

ހަނގުރާމަ ހުއްޓައިލުމުގެ މަޝްވަރާތަކުގައި އިސްރާއީލުގެ ޖާސޫސީ އިދާރާ، މޮސާޑްގެ ޖާސޫސީ ވެރިޔާ ޑޭވިޑް ބާނިއާ އިސްކޮށް ހުރެގެން ބައިވެރިވީ ހަމާސް ނައްތާލެވެންދެން ހަނގުރާމަކޮށް، ހަމާސްއިން ރަހީނުކޮށްފައިވާ ރަހީނުން މިނިވަންކުރުމުގެ ޝަރުތާ އެކު ކަމަށް ވެސް ހައްދު ފަހަނަ އަޅާފައިވާ ނަތަންޔާހޫ ވަނީ ބުނެފައެވެ. އަދި ގަތަރުގެ މަޝްވަރާތަކުގައި އުންމީދީ ނިންމުންތަކެއް އެމެރިކާއިން ފާޅުކުރި ނަމަވެސް، ހަމާސް ނައްތާލެވެންދެން ހަނގުރާމައިގައި ދޫނުދޭނެ ކަމަށް ވެސް ނަތަންޔާހޫ ވަނީ ބުނެފައެވެ.

މިއީ މިފަދަ ގޮތަކަށް ރަފަހްގެ ސަރަހައްދީ ރޮނގުގެ ފަލަސްތީނު ފަޅީގެ ކޮންޓްރޯލު ހޯދުމަށް އިސްރާއީލުން ބާރުއެޅި ފުރަތަމަ ފަހަރެވެ.

ހަމާސް ނައްތައިލުމުގެ މަގުސަދުގައި ކަމަށް ބުނެ ނިރުބަވެރި އިޒްރާއީލުން ދެމުންދާ ހަމަލާތަކުގައި އެމީހުންގެ އަމާޒު ފަތްގަނޑަކަށް ހަދާފައިވަނީ ހަނގުރާމައިގެ ބައިވެރިންގެ ތެރޭގައި ނުހިމެނޭ ކުޑަ ކުދިންނާ އަންހެނުންގެ އިތުރުން އުމުރުން ދުވަސްވީ މީހުންނެވެ. އެހެންކަމުން ދުނިޔޭގެ ގިނަ ގައުމުތަކުން ގަބޫލުކުރާ ގޮތުގައި އެއީ ނަސްލެއް ނައްތާލުމަށް އިޒްރާއީލުން ދެމުންދާ ހަމަލާތަކެކެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން އިޒްރާއީލުން ފަލަސްތީނަށް ދެމުންދާ ހަމަލާތަކުގައި 182000 (އެއް ލައްކަ އަށްޑިހަ ދެހާހަށް) ވުރެ ގިނަ މީހުންވަނީ ޝަހީދުވެފައެވެ.