ހައުސް އޮފް ޕީއެންސީގައި ވެރިކަން ކުރާ ޕާޓީން ބޭއްވި ޖަލްސާގައި ވާހަކަފުޅު ދައްކަވަމުން ފަތުރުވެރިކަމާއި ބެހޭ ވަޒީރު އިބްރާހީމް ފައިސަލްއަށް ޕީޕީއެމް ސަރުކާރުގައި ނައިބު ރައީސްކަން ކުރެއްވި ޑރ މުހައްމަދު ޖަމީލްގެ ވަނަވަރު ނުބައިކޮށް ވިދާޅުވުމުން ގިނަ ބަޔެއްގެ ފާޑިކިޔުން އަމާޒުވެއްޖެއެވެ.

މިގޮތުން މި ޖަލްސާގައި ވާހަކަދައްކަވަމުން ފައިސަލް އިތުރަށް ވިދާޅުވީ ޑރ ޖަމީލް އަކީ އަމިއްލަފުޅަށް މާ މޮޅު ވަކީލެއްކަމަށް ދައުވާ ކުރަމުން އަންނަ ކަމަށާއި، އެމަނިކުފާނަށް ހަމައެކަނި ކުރެވުނު ކަމަކީ "އެޓާނީ ޖެނެރަލް" މަގާމުގައި ހުންނެވިއިރު ބަޔެއްގެ ވިޔަފާރި ހަލާކުކޮށްލެވުނު ކަމެވެ.

ނަމަވެސް ޑރ ޖަމީލްއަކީ ދުވަހަކުވެސް އެޓާނީ ޖެނެރަލްގެ މަގާމު އަދާކުރެއްވި ބޭފުޅެއް ނޫނެވެ. ގައުމުގެ ވުޒާރާއެއްގެ ވަޒީރުކަން ކުރައްވާ ބޭފުޅަކަށް މި ގައުމުގެ ނައިބު ރައީސްކަން ކުރެއްވި ބޭފުޅެއްގެ ވަނަވަރު ނޭގުމަކީ ލަދުވެތިވާންޖެހޭ ކަމެކެވެ.

ރަނގަޅު ތައުލީމެއް ނެތި، މަގާމުގެ ގާބިލިއްޔަތުކަމެއް ނެތި ޕޯޑިޔަމް ތަކަށް އަރާ ފައިސަލް ގެންދަވަނީ ސަރުކާރުގެ ނާގާބިލުކަން ހާމަކޮށްދެމުންނެވެ. މީގެ އިތުރުން ރާއްޖެއިން ބޭރުގެ ފޯރަމްތަކުގައިވެސް ފައިސަލް އަކީ މަގާމަށް އެކަށޭނަ މީހެއް ނޫންކަން އަންނަނީ ސާބިތުކޮށްދެމުންނެވެ.

ސަރުކާރުގެ ދިފާއު ކުރުމުގެ ނަމުގައި ބޮޑެތި ދޮގުތައް ހައްދަވަމުން ގެންދަވާއިރު ވަކި ހައްދެއް އޮންނަންވާނެ ކަމަށް ގިނަ ފަރާތްތަކުން އަންނަނީ ބުނަމުންނެވެ.