ކާންދިން މީހާ އަތުގައި ދަތް ނާޅާށެވެ. ކުކުޅަށް ވުރެ ބިސް ދޮށީ ނުވާށެވެ. މިއީ ދިވެހިންގެ ދިރިއުޅުމުގައި ބޭނުންކުރާ ހަރު ބަސް ތަކެކެވެ.

ދައްކަން މިއުޅެނީ މިހާރުގެ ސިޔާސީ މައިދާނުގައި އުޅޭ ބައެއް "ސިޔާސީ" ފިޔޮކުންގެ ވާހަކައެވެ. ރޯނު އެދުރުންނަށް ވެގެން މުޅި ގައުމުގައި ހުދު ފޮށާ އަޅައިގެން ދުވާ ބައެއްގެ ވާހަކައެވެ.

2023 ރިޔާސީ އިންތިހާބާ ހަމަ ޖެހިލާނަމެވެ. ޕީޕީއެމް / ޕީއެންސީގެ ރިޔާސީ ކެންޑިޑޭޓުގެ ކެންޑިޑޭންސީ ބާތިލުކުރުމުން ދަނޑިވަޅު ބަލާ، މާކުރިން ފެށިގެން ރާވާފައި އޮތް ރޭވުމެއް ކާމިޔާބުކުރަން ކޯޓު ފަޓުލުޏުގައި ތިބި ހިޔަޅުންތަކެއް މަސައްކަތްކުރި މަންޒަރު ފެނިގެން ދިޔައެވެ. ތައްގަނޑެއް ވަގަށް ނަގައިގެން ފޯމު ފުރާ އިލެކްޝަނަށް ލީއޭ ވެސް ކިޔާ އަޑު އިވުނެވެ.

ކޮންމެ އަކަސް ކޭ ބަޔަކު ކައިގެން ލީ ބަޔަކު ލައިގެން ރިޔާސީ އިންތިހާބު ޕީޕީއެމަށް ކާމިޔާބުވިއެވެ. އެއާއެކު އައު ސަރުކާރެއް ގާއިމުވެގެން ދިޔައެވެ. ސަރުކާރުގައި ގިނައީ ރާއްޖެ ދުށް އެންމެ ހިންގުންތެރި ރައީސް، ރައީސް އަބްދުﷲ ޔާމީންގެ އަރިހުން ދަރިވަރުވެފައި ތިބި ވަޒީރުންނާ ނައިބުންނާ ސްޓޭޓުންނާ ވެރިންނެވެ.

އައު ސަރުކާރާ އެކު ރައްޔިތުންގެ އުއްމީދުތަކުގައި ކުލަ ޖެހޭނެ ކަމަށް ގިނަ ބަޔަކު ދުށް ހުވަފެން ބިލާހަކަށް ވާން ފެށީ ދާދި އަވަހަކަށެވެ. ވައުދާ އަހުދާ ޚިލާފުވެ ރައީސް މީހާއާ އެހެން ވެރިންވެސް އެންމެ ފުރަތަމަ ދުވަހުން ފެށިގެންވެސް އޮޅުވާލަން ފެށިއެވެ. ރައީސް ޔާމީން އެންމެ ފުރަތަމަ ދުވަހުވެސް މިނިވަން ކުރާނެ ކަމަށް ބުނެ އައިސް އެ ވައުދާ ޚިލާފުވެގެން ފެށިގެން ދިޔަ ބޭވަފާތެރިކަމުގެ ސިލްސިލާ ދިގު ދެމެން ފެށިއެވެ.

އިންތިހާބުގެ ކުރިން ކީހާ ޅެން ފަރިއްސަށްވިއެވެ. ރައްޔިތުންގެ ރުޅި ގަނޑު ފަޅައިގެން ގޮސް ސަރުކާރުގެ ނާގާބިލުކަމާ މެދު ފާޑުކިޔަން ފެށުމުން ދެން ޖާމިނުކުރީ ގައުމުގެ ދަރަންޏާ ކުރި ސަރުކާރާއެވެ.

އިގްތިސޯދުގެ ހީނަރު ކަމުގެ ވާހަކަ މާހިރުން ދައްކަން ފެށުމުން އެކަމުގެ ދިފާއުގައި ނެރެނީ ސިޔާސީ ގޮތުން އަލިފުބާ ޖަހަމުން ހަ މަސް ދުވަހުގެ އުނގެނުމުގައި ތިބި ކުދިންނެވެ. ރައްޔިތުންގެ ލޮލުގައި އަނދުން އަޅުވަން މަސައްކަތްކުރަން ފެށި ފެށުން ނަމަވެސް ދަނީ ފަނު ފުލުންނެވެ. އެހެނީ ރައްޔިތުންނަށް ހަގީގަތް ހާމަކޮށްދޭނެ ކަމާ ގުޅުން ހުރި ބޭފުޅުން ގައުމުގައި ތިބުމުންނެވެ.

ކުރިން ވެސް ދަންނަވާލި ފަދައިން މި ސަރުކާރަކީ ރައީސް ޔާމީންގެ ހިޔަނިން އައިސްފައިވާ ސަރުކާރެކެވެ. އެމަނިކުފާނުގެ ނަމާ ފޮޓޯ އަދި ހުސް ގޮނޑި ބޭނުންކޮށްގެންނެވެ. އަދި ސަރުކާރުގެ އިސް ވެރިންގެ ގޮތުގައި ތިބެއްވީ އެމަނިކުފާނުގެ ސިޔާސީ ދަރިވަރުންނެވެ. އެހެންކަމުން އެދުރު މީހާއަށް ކިޔަވައިދޭން ދަރިވަރުން ނުކުތުމުން ބުނާނީ ޔަގީނުންވެސް ކުކުޅަށް ވުރެ ބިސް ދޮށި ވަނީ ކަމަށެވެ.

ހިޔަންޏަށް މުޑި ނެގުމަކީ އޭގެ ޒާތުގައި ނުރައްކާތެރިކަމެކެވެ. އަދުގެ ޓުއަރިޒަމް މިނިސްޓަރު އިބްރާހިމު ފައިސަލް އަކީ ރައީސް ޔާމީންގެ ދަރިވަރު އަބްދުއްރަހީމުގެ ދަރިފުޅެވެ. އެހެންކަމުން ބައްޕަގެ އެދުރު މީހާއަށް ފާޑުކިޔަން ފައިސަލް އިޒް ވޭ ޓޫ ފާރ އެވެ. އަސްތާ މިހެން ބުނީމާ އަދި ފައިސަލަށް ނޭނގޭ ދެއްތޯއެވެ. މި ބުނެނވުނީ އިނގިރޭސިން ވިއްޔާއެވެ. މި ބުނީ ބައްޕަގެ އެދުރަށް ފާޑުކިޔޭ ފެންވަރު ފައިސަލްގައިގައި އަދި އަމުދުން ނުހުންނާނެ ވާހަކައެވެ.

އިގްތިސޯދީ ގޮތުން ދައްކާ ވާހަކަައިގައި ރައީސް ޔާމީނާ ތަޅަން ކެބިނެޓުގައި ހުރި އުނގެނޭ ވަޒީރު ނެރުމުން އެނގި ހާމަވެގެން ދަނީ ރައީސް މުއިއްޒުގެ ސަރުކާރުގައި އިގްތިސޯދު އެނގޭ ބަޔަކު ނެތްކަމެވެ. ހިސާބުން ހިސާބުގައި ތަޅައިގެން ރައްޔިތުންނަށް ފެކްޓު ދައްކަވަމުން ރައީސް ޔާމީން ވަޑައިގެންނަވާއިރު، ސަރުކާރުގައި ހިސާބު ސޯ ހުއްޓަސް ވާކަމެއް ނެތް ކަމެވެ.

ހަ މަސް ދުވަހުގެ އެލް ބޯޑެއް އަޅުވައިގެން ގައުމެއްގެ ވަޒީރުކަން ކުރާ ފުރތަމަ ބޭފުޅާއަށް ފައިސަލް ވާނެ އިރު ފައިސަލަށް އެހެން ބަޔަކަށް ފާޑުކިޔާ ރައްދު ދެވިދާނެތޯ މިއީ މިއަދު ގިނަ ބަޔަކު އުފައްދާ ސުވާލެކެވެ. އަދި އަމުދުން ރައީސް ޔާމީންގެ ސިޔާސީ ފިޔަގައި އެލިގަނެގެން ފަސް އަހަރު ބައްޕާފުޅު ވެސް އެމަނިކުފާނުގެ ސިޔާސީ ޕާޓީގެ ހިޔަލުގައި އުޅޭފައި ހުރިއިރު، ރައީސް ޔާމީންގެ ސިޔާސީ ޝަޚްސުގެ ހިޔަނީގައި އައިސް މަގާމުތަކުގައި ތިބެ އިސްކޮޅު ނުކަތާ ވަރުގެ ވާހަކަ ދެއްކީމާ ކަމަކު ނުދާނެއެވެ.

މެކުނު ފުމުނަސް ގާހަކައަށް ނުފުމެވޭނެއެވެ.