ރޯދަ މަހު އިންތިހާބުތައް ބޭއްވުން މަނާ ކުރަން އިންތިހާބުތަކާ ބެހޭ އާންމު ގާނޫނަށް އިސްލާހު ހުށަހަޅައިފިއެވެ.
މި އިސްލާހު ހުށައަޅާއިފާ ވަނީ އިހަވަންދޫ ދާއިރާގެ މެންބަރު މުހައްމަދު ޝިފާއުއެވެ. އިސްލާހު ހުށައަޅަމުން ޝިފާއު ވިދާޅުވީ ރޯދަ މަހާ ދިމާކޮށް އިންތިހާބު ތާވަލުކުރެވޭތީ ރައްޔިތުންގެ މެދުގައި އުފެދިފައިވާ ބޮޑު ނުތަނަވަސްކަމާ ގުޅިގެން އިންތިހާބުގައި ރައްޔިތުންގެ ބައިވެރިވުން ކުޑަވެދާނެކަމާ މެދު އޮތް ކަންބޮޑުވުމަށް ހައްލެއް ހޯދުމަށް އިންތިހާބުތަކާބެހޭ އާންމު ގާނޫނުނަށް އޭނާ އިސްލާހު ހުށަހަޅާފައިވާ ކަަމަށެވެ.
މަޖިލިސް އިންތިހާބު ބޭއްވުމަށް އިލެކްޝަން ކޮމިޝަން (އީސީ) އިން ނިންމާފައިވަނީ ކުރިއަށް އޮތް މާރޗު މަހުގެ 17 ވަނަ ދުވަހު އެވެ. އެއީ ބަރަކާތްތެރި ރަމަޟާން މަހުގެ 7 ވަނަ ދުވަހުއެވެ.
ގިނަ ފަރާތްތަކުން ދަނީ އިންތިހާބު ބާއްވާ ތާރީހް ފަސްކުރުމަށް ގޮވާލަމުންނެވެ. އެހެންނަމަވެސް އިންތިހާބު ބާއްވާ ތާރީހަށް އިތުރު ބަދަލެއް ގެނެވޭނީ ގާނޫނަށް ބަދަލު ގެނަސްގެންނެވެ.
ޝިފާއު ހުށައަޅާފައިވާ އިސްލާހުގައި ބުނެފައިވަނީ ގާނޫނުގައި އެހެން ގޮތަކަށް ބުނެފައި އޮތްނަމަވެސް ރަމަޟާން މަހު އިންތިހާބެއް ބާއްވައިގެން ނުވާނެ ކަަމަށެވެ. އަދި އިންތިހާބު އޮންނަ ދުވަސް ރޯދަ މަހުގެ ދުވަހަކާއި ދިމާވާނަމަ އެ އިންތިހާބެއް ބާއްވަން ވާނީ ރޯދަ މަސް ނިމޭތާ 10 ދުވަސް ފަހުން ކަަމަށް އެ އިސްލާހުގައި ބަޔާންކޮށްފައިވެއެވެ.
