ރައްޔިތުން ލައްވާ ޚަރަދު ކުޑަކުރުމުގެ ބަދަލުގައި ދައުލަތުގެ ޚަރަދުތައް ކުޑަކުރުމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ގޮވާލައްވައިފިއެވެ.

ޑރ. ޖަމީލު މިފަދައިން ގޮވާލެއްވީ އެކްސްގައި ކުރެއްވި ޕޯސްޓެއްގައެވެ.

ރިޔާސީ އަދި މަޖްލިސް އިންތިޚާބުތަކާ ދިމާކޮށް އެތަކެއް އެއަރޕޯޓެއް، ބްރިޖްތައް، ބަނދަރުތައް، ފްލެޓް އަދި ސިފައިންނާ ފުލުހުންގެ މުސާރަ ޑަބަލް ކުރިކަމަށާ އެކަނިވެރިމައިންނަށް 12000 ރުފިޔާ ދިނުމުގެ ވައުދުވެސް ވީކަން ޑރ. ޖަމީލު ފާހަގަކުރައްވާފައިވެއެވެ.

މީގެ އިތުރުން ސިޔާސީ މަގާމު، 700އަށް ވުރެ ގިނަ ނުކުރުމުގެ ވައުދުވި ނަމަވެސް ސީނިއަރ މިނިސްޓަރުންގެ އަދަދު އެކަނިވެސް ނޭގޭހާ ގިނަކަމަށް ޑރ. ޖަމީލު ވިދާޅުވިއެވެ.

މީގެ އިތުރުން އިތުރު 4 ވުޒާރާއެއް އަލަށް އުފެއްދިކަމަށާ އަމިއްލަ ބަފައިބެއަށް ބޮޑު މުސާރައިގައި އެމްބަސީގައި ވަޒީފާދީ ވެރިން ރައީސް އޮފީސް ވެސް ފުރާލާފައިވާ ކަމަށް ވެސް ވިދާޅުވިއެވެ.

ކަނޑައެޅިގެން ރައްޔިތުންގެ ފައިސާގައި ވެރިން ނާޗަރަންގީ ކުޅެމުން ބޮޑެތި އޮޅުވާލުން އޮޅުވާލަމުްނދާކަމަށް ތުހުމަތު ކުރައްވާ ޑރ. ޖަމީލު ވިދާޅުވީ އެއީ ނިފާގަތުގެ އަމަލެއްކަމަށެވެ.

ރައްޔިތުންގެ ޚަރަދުތައް ކުޑަކުރަން ގޮވާލުމުގެ ބަދަލުގައި ސަރުކާރާއި އެމްބަސީތަކާއި އެސްއޯއީތައް ކުޑަކުރަން ސަރުކާރަށް ޑރ. ޖަމީލުވަނީ ގޮވާލައްވާފައެވެ. އެގޮތަށް އެކަން ނުވަނީކަމުގައިވަނި ސަރުކާރު ހިންގުމުގައި ފެއިލްވެއްޖެ ކަމަށް ގަބޫލުކޮށް ވެރިން ގެއަށް ވަޑައިގަންނެވުމަށް ފަހު ރައްޔިތުންނަށް އައު އިންތިޚާބަކަށް ފުރުސަތު ދެއްވުމަށް ވަނީ ގޮވާލައްވާފައެވެ.

ޑރ. ޖަމީލު މިފަދައިން ގޮވާލައްވާފައި މިވަނީ ރައީސް އޮފީހުގެ މިނިސްޓަރު އަލީ އާރިފު، ގަރުދިޔަ އާ ބަތާ ކައިގެން ޚަރަދުކުޑަކޮށް ދިރިއުޅުމުގެ ހާލަތު ތިރިކުރަން ރައްޔިތުންނަށް ގޮވާލާފައިވާ ދަނޑިވަޅެއްގައެެވެ.