މި ސަރުކާރުން ހައްލު ކުރަން ބުނި ޑޮލަރުގެ މައްސަލަ ހައްލު ނުވެ، އެމެރިކާ ޑޮލަރުގެ އަގު ކަޅު ބާޒަރުގައި 18.25 ރުފިޔާއަށް އުފުލިއްޖެއެވެ.

"ތޭރަ އޮންލައިން" އަށް މައުލޫމާތު ދެމުން ޑޮލަރުގެ ބާޒާރު ކުރާ ފަރާތެއް ބުނީ ޑޮލަރުގެ ގަންނަ އަގު މިއަދު ހުރީ 17.95ރ. އާއި 18.15ރ. އާ ދެމެދުގައި ކަމަށެވެ.

އަދި ޑޮލަރު ވިއްކަން ހުރީ 18.05ރ. އާއި 18.25ރ. ދެމެދުގެ ރޭޓެއްގައި ކަމަށެވެ.

މިއަހަރުގެ ޖެނުއަރީ މަހުން ފެށިގެން ޑޮލަރުގެ އަގު ކަޅު ބާޒާރުގައި ހުރީ 18 ރުފިޔާއަށެވެ. އޭގެ ފަހުން މި މަހު އަނެއްކާ އެ އަގު ވަނީ 18.25 ރުފިޔާއަށް އުފުލިފައެވެ.

ޑޮލަރުގެ އަގު އުފުލުނީ ޑޮލަރުގެ އަގު އުފުލިގެން އުޅެން ދެން ނުޖެހޭނެ ކަމަށާއި ދެން ފެންނާނީ ޑޮލަރުގެ އަގު ހެޔޮވަމުން ދާތަން ކަމަށް ރައީސް ޑރ. މުހައްމަދު މުއިއްޒު ވިދާޅުވިތާ ދެ މަސް ދުވަސް ވެސް ނުވަނީސް ޑޮލަރުގެ އަގު 18ރ. އަށް ވަނީ އުފުލިފައެވެ.

ކުރިޔަށް އޮތް ދެތިން މަހދެއްގހެ ތެރޭގައި ޑޮލަރުގެ މައްސަލަ ހައްލުވާނެ ކަަމަށް އިކޮނޮމިކް މިނިސްޓާރ މުހައްމަދު ސައީދު ވިދާޅުވި ފަހުންވެސް މިހާރު 6 ވަރަކަށް މަސް ވަނީ ވެފައެވެ.