ހުސް ވާހަކަ ވާވަރަށް ދެއްކިއްޖެކަމަށާ އެހެންކަމުން ދެން ދެއްކެވި ވާހަކައިގެ ނަތީޖާ ދައްކަވެވުމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ރައީސް ޑރ. މުހައްމަދު މުއިއްޒަށް ގޮވާލައްވައިފިއެވެ.
ޑރ. ޖަމީލު މިފަދައިން ވިދާޅުވީ، ފިހާރަތަކުން ކަނޑުމަހުގެ ބާވަތްތައް ހުސްވެފައިވާ ކަމަށް ނޫހެއްގައި ޝާއިއުކޮށްފައިވާ ޚަބަރެއް ހިއްސާ ކުރައްވާ އެކްސްގައި ކުރެއްވި ޕޯސްޓެއްގައެވެ.
ޑރ. ޖަމީލުވަނީ ސަރުކާރުގެ ވެރިން ވެރިކަމަށް އައުަމށް ވަރަށް ގިނަ ވައުދުވެވަޑައިގެންނެވިކަން ފާހަގަކުރައްވާފައެވެ. އެގޮތުން ރައީސް މުއިއްޒުގެ ވާހަކަފުޅުތައް ވަރަށް ގިނަ ކަމަށާ ވަޒީރުންތައް ހުއްޓުމެއް ނެތި ދަތުރުތަކުގައިއޫލުއްވަމުން ގެންދާވަކަމަށް ޑރ. ޖަމީލު ވަނީ ވިދާޅުވެފައެވެ.
މީގެ އިތުރުން މި ސަރުކާރުގައި ތިއްބެވި ބޭފުޅުންގެ ފަރާތުން ހަރުދަނާ ލީޑަރޝިޕެއް އަދި ޕޮލިސީއެއް ނުފެންނަކަން ފާހަގަކުރައްވާ ޑރ. ޖަމީލު ވަނީ ސަރުކާރުގެ ޚަރަދުތައް ކުޑަކުރާތަން ނުފެންނާތީ ކަންބޮޑުވުމާ ނުރުހުން ފާޅުކުރައްވާފައެވެ.
ޑރ. ޖަމީލުގެ ޕޯސްޓުގައިވަނީ މިހާރު ރާއްޖެ ދެކެމުންދާ ދަތިކަމާ ތަދުތަކަކީ މި ފަހުގެ ތާރީޚެއްގައިވެސް މިހާލަތަށް ރާއްޖެ ވެއްޓުނު ހާލަތެއް ނޫން ކަމަށްވެސް ވިދާޅުވެފައެވެ.
