ޕީއެންސީއިން ބޭއްވި ރައްޔިތުންގެ މަޖިލިސް އިންތިހާބުގެ ޕްރައިމަރީގައި ބ. ތުޅާދޫ ދާއިރާއަށް ވާދަކޮށް ނާކާމިޔާބުވި ކެންޑިޑޭޓް މުހައްމަދު އަތީފު (ތުޅާދޫ އަތީފް)އަށް އެ ރަށު ސިއްހީ މަރުކަޒުން ސިޔާސީ މަގާމެއް ދީފިއެވެ.

އަތީފު އައްޔަންކޮށްފައިވަނީ ބ. ތުޅާދޫ ސިއްހީ މަރުކަޒުގެ ސީނިއާ ޕޮލިޓިކަލް ޑިރެކްޓަރުގެ މަގާމަށެވެ. އޭނާ އެ މަގާމަށް އައްޔަންކުރިކަން ސިއްހީ މަރުކަޒުގެ ފޭސްބުކް ޕޭޖުންވެސް ވަނީ ރަސްމީކޮށް ހާމަކޮށްފައެވެ.

ޕީއެންސީގެ މަޖިލިސް ޕްރައިމަރީގައި އަތީފު ބަލިކޮށް ޓިކެޓު ކާމިޔާބު ކުރީ ހަސަން ނިޒާމު (ކައްޑެ) އެވެ. ނަމަވެސް ފަހުން އަތީފު ކެމްޕެއިންގައި ކޮށްދީފައިވަނީ އެ ދާއިރާއަށް އަމިއްލަ ގޮތުން ވާދަކުރައްވައި ގޮނޑި ކާމިޔާބު ކުރެއްވި އަބްދުލް ހަންނާން އަބޫބަކުރަށެވެ.

ސަރުކާރުން ހަރަދު ކުޑަކުރުމުގެ ގޮތުން ސިޔާސީ މަގާމުތައް މަދުކުރައްވާނެ ކަމަށް ރައީސް ޑރ. މުހައްމަދު މުއިއްޒު އިއުލާން ކުރައްވާފައި ވަނިކޮށް، އިތުރު ސިޔާސީ މަގާމެއް އުފައްދަވާ އަނެއްކާވ ވެސް ސިޔާސީ މަގާމުތަކުގެ ލިސްޓަށް ނަމްބަރު އިތުރުކުރާތީ ރައްޔިތުން ގެންދަނީ ނުރުހުން ފާޅުކުރަމުންނެވެ.