ކޮންމެ ދުވަހަކު ރައްޔިތުންގެ ސުވާލުތަކަށް ޖަވާބު ދިނުމުގެ ގޮތުން ރައީސް ޑރ މުހައްމަދު މުއިއްޒު ފެއްޓެވި "ރައީސް ގެ ޖަވާބު" ޕްރޮގްރާމް ހުއްޓިފައި އޮންނަތާ ދެމަހަށް ވުރެ ގިނަ ދުވަސްވެއްޖެއެވެ.

ރައީސް އޮފީހުން ރައީސްގެ ޖަވާބު ޕްރޮގްރާމްގެ ވީޑިޔޯއެއް އެންމެ ފަހުން އާންމުކޮށްފައި ވަނީ އޭޕްރިލް މަހުގެ 7 ވަނަ ދުވަހުގައި ކަން ފާހަގަކޮށްލެވެއެވެ.

މިކަމާ ގުޅޭގޮތުން ރައީސް އޮފީހުން ބުނީ ޕްރޮގްރާމް ކުރިޔަށް ގެންދިޔުމަށްޓަކައި ހުޅުވަންޖެހޭ ޕޯޓަލެއްގެ މަސައްކަތް ކުރިޔަށްދާކަމަށެެވެ. އަދި ޕޯޓަލް ނިމުނުހާ އަވަހަށް ޕްރޮގްރާމް ފެށޭނެކަމަށެވެ.

ރައީސް އޮފީހުން ވަނީ މި ޖަވާބު މިދިޔަ މަހުގައި ވެސް ނޫސްވެރިންނަށް ދީފައެވެ.

ހުރިހާ ރައްޔިތުންނަށް ވެސް ރައީސް މުއިއްޒާ ސުވާލު ކުރުމުގެ ފުރުސަތު ދިނުމުގެ ގޮތުގައި ސަރުކާރުން ފެއްޓެވި މި ޕްރޮގްރާމްގައި ގިނައިން ޖަވާބު ދީފައިވަނީ ސަރުކާރަށް ތާއިދު ކުރާ ފަރާތްތަކުގެ ސުވާލުތަކަށެވެ.

ސަރުކާރާ އިދިކޮޅު ފަރާތްތަކުން ކުރާ ސުވާލުތަކަށް ޖަވާބު ނުލިބި މަސް ދުވަސްވެފައިވާކަން "ތޭރަ އޮންލައިން" އަށް ވަނީ ކަށަވަރުވެފައެވެ.