ކުރިއަށް މިއޮތް 20 ވަނަ ރައްޔިތުންގެ މަޖިލިސް އިންތިހާބާ ގުޅިގެން އަންނަ ހަފްތާ ބަންދު ދުވަސްތަކުގައިވެސް އިންތިހާބަށް ކުރިމަތިލާ ފަރާތްތަކުގެ ރެކޯޑު ސާފުކުރުމުގެ އިންތިޒާމްތައް ޑިޕާޓްމެންޓް އޮފް ޖުޑިޝަލް އެޑްމިނިސްޓޭޝަނުން ހަމަޖައްްސައިފިއެވެ.
ރައްޔިތުންގެ މަޖިލިސް އިންތިހާބަށް ކުރިމަތި ލުމުގުެ ފުރުސަތު މި ހިނގާ ޖެނުއަރީ މަހުގެ 31 ވަނަ ދުވަހުން ފެށިގެން ފެބްރުއަރީ މަހުގެ 14 ވަނަ ދުވަހާ ހަމައަށް ވަނީ ހުޅުވާލާފައެވެ.
ޑީޖޭއޭ އިން ބުދަ ދުވަހު ވިދާޅުވީ ކުރިއަށް މިއޮތް ދެ ހަފްތާ ބަންދު ދުވަސް ތަކުގައިވެސް އެ ޑިޕާޓުމެންޓުގެ ރިސެޕްޝަން ބައެއް ގަނޑިތަކުގައި ހުޅުވާފައި ހުންނާނެ ކަމަށެވެ. އެގޮތުން 2 ފެބްރުއަރީ ވާ ހުކުރު ދުވަހާ 9 ފެބްރުއަރީ ވާ ހުކުރު ދުވަހުގެ ހަވީރު 16:00 އިން އިރުއޮއްސި 19:00 އާ ހަމައަށް ހުޅުވާފައި ހުންނާނެ ކަމަށާއި އަދި 3 ފެބްރުއަރީ ވާ ހޮނިހިރު ދުވަހާ 10 ފެބްރުއަރީ ވާ ހޮނިހިރު ދުވަހު 11:00 އިން މެންދުރުފަހު 15:00 އާ ހަމައަށް ހުޅުވާފައި ހުންނާނެ ކަމަށެވެ.
މީގެ އިތުރުން ޑީޖޭއޭއިން ވިދާޅުވީ ރެކޯޑު ސާފުކުރުމަށް ފަސް ދުވަހުގެ މުއްދަތެއް ހިނގާނެ ކަމަށާއި ރެކޯޑު ސާފުކުރުމަށް ހުށައަޅާއިރު މި މުއްދަތު ލިބޭނެ ހެން ހުށައެޅުމަށް ސަމާލުކަން ދިނުމަށް ވަނީ އެދިފައެވެ.
