ކުރީ ސަރުކާރުގައި މި ސަރުކާރުގެ ވެރިން އެންމެ ބޮޑަށް ފާޑުކީ އެ ސަރުކާރުގެ ސްޕީޑަށެވެ. ނުވަތަ ދުވެއްޔަށެވެ. އެގޮތުން އެއީ ފިނިހަކަ ސްޕީޑުގެ ސަރުކާރެއް ކަމަށް ބުނެ ލައްކަ ހަޖޫ ޖަހާ މަލާމާތްވެސް މިވެރިން އޭރުކުރިއެވެ.

ކޮންމެ އަކަސް ވެރިކަން ލިބިގެން ފުރަތަމަ ދުވަސްކޮޅު ރައްޔިތުން ލޮލުގައި އަނދުން އަޅުވަން ބައެއް މަޝްރޫއުތައް ގަވާއިދާ ޚިލާފަށް ފަށާ ސަރުކާރުގެ ސަނާ ކިޔާ ގްރޫޕުން އެއީ މުއިއްޒު ސްޕީޑު ކަމަށް ބުނެ ނިކަން ފޮނު އެރުވިއެވެ.

ނަމަވެސް ވެރިކަމަށް މާ ގިނަ ދުވަހެއް ނުވެ އެ ބުނާ ސްޕީޑެއް މަޑުވެ އެކޮށް ހުއްޓުން އެރި މަންޒަރު ފެނިގެން ދިޔައެވެ. ދެން އެކަން ވެސް ޖާމިނު ކުރީ ކުރީ ސަރުކާރާއެވެ.

ކޮންމެ އަކަސް މި ސަރުކާރަކީ ނުހަނު ގިނަ ކަންކަން ރައްޔިތުންނަށް ކޮށްދޭނެކަމުގެ ވައުދާއެކު ސަރުކާރެކެވެ. އެގޮތުން ނިމި ދިޔަ ސަރުކާރުން ވަންހަނާ ކޮށް ސިއްރިކޮށްފައި ހުރި 100 އަށް ވުރެ ގިނަ ގޮތް ނޭނގޭ އެއްބަސްވުން ވަގުތުން ވަގުތަށް ހާމަކުރާނެ ކަމަށް ވައުދުވިއެވެ.

ނަމަވެސް ވެރިކަން ކުރަން ނޭނގި އިންޑިއާ ފައިބުޑަށް ސަލާމުގެ ނާށީގަނޑޫ ހިފައިގެން ދުވަން ފެށި ހިސާބުން އެ އެއްބަސްވުންތައް ދެއްކުން ކުރީ ސަރުކާރުން ކީ ލަވައަށް ހަމަ ވެގެން ދިޔައެވެ. ގައުމީ ސަލާމަތަށް ނުރައްކާވާނެ ކަމުގެ ލަވަ ރާގަށް ފައްތަމުން ސަރުކާރުގެ ވެރިން ކިޔަން ފެށިއެވެ.

ވެރިކަން ލިބުމުން ބުނަން ފެށީ ތަރައްގީގެ މަޝްރޫއުތައް ކުރިއަށް ކަނޑާނީ މަޖިލީހުގެ މެޖޯރިޓީ ލިބިގެން ކަމަށެވެ. އެހެންކަމުން ރައްޔިތުން ތަރައްގީ ބޭނުންނަމަ މަޖިލީހުގެ މެޖޯރިޓީ ވެރިކަން ކުރާ ޕާޓިއަށް ދިނުމަށް ހަރު އަޑުން މަޖިލީހުގެ އިންތިހާބުގެ ތެރޭގައި ވެރި މީހާ ގޮވަމުން ދިޔައެވެ. ރައްޔިތުން ބޮލަށް ޗިޕު ޖަހައިގެން މަޖިލީހުގެ ސުޕަރ މެޖޯރިޓީ ވެސް ހޯދިއެވެ. ނަމަވެސް އެހާ ހިސާބުން ދެން ބުނަން ފެށީ ބަޖެޓު ނެތް ކަމަށެވެ. މާލީ ހާލަތު ދެރަކަމުން ތަރައްގީގެ މަޝްރޫއުތައް ހުއްޓާލަން ޖެހިއްޖެ ކަމަށެވެ.

ރައްޔިތުންގެ ލޮލުގައި ކޫރުން ދަމަމުން ކީ ޅެންތައް ފަރިއްސަށް ވިއެވެ.

ބަޖެޓަށް ލަފާ ދިނުމުގެ ގާނޫނީ ޒިންމާ އޮންނަ މަރުކަޒީ ބޭންކާއި އޮޑިޓާރ ޖެނެރަލް އޮފީހުން އެންމެ ބޮޑަށް ބާރުއެޅީ، ބަޖެޓަށް ބޭނުންވާ ފައިސާ އަވަހަށް ހޯދުމަށް ކަމަށްވީ ނަމަވެސް އެކަން ވެސް އޮތީ ހަމަ ނުވެފައެވެ.

އަހަރަށް ފާސްކުރީ 16.3 ބިލިއަން ރުފިޔާ ޑެފިސިޓު ބަޖެޓެކެވެ. އެއީ އާމްދަނީގެ ޑެފިސިޓް ފޫބައްދަން 8.8 ބިލިއަން ރުފިޔާ އާއި ދަރަނީގެ އިންޓްރެސްޓް އަދާކުރަން 5.2 ބިލިއަން ރުފިޔާ އާއި ޕްރިންސިޕަލް އަދާކުރަން 2.2 ބިލިއަން ރުފިޔާއެވެ.

ފިނޭންސް މިނިސްޓްރީން އާންމުކޮށްފައިވާ މި އަހަރުގެ "އެނުއަލް ބޮރޮއިން ޕްލޭން" ގައިވާ ގޮތުގައި، މި ފައިސާ ހޯދާނީ އެތެރޭގެ ބާޒާރުން ހޯދަނީ 3.9 ބިލިއަން ރުފިޔާ އަދި ބޭރުގެ ބާޒާރުން، ސަރުކާރުތަކާއި އިންވެސްޓަރުން ހިމެނޭ ގޮތަށް، ހޯދަނީ 12.3 ބިލިއަން ރުފިޔާ އެވެ. މީގެ ތެރެއިން 8.4 ބިލިއަން ރުފިޔާ ދޭނެ ބަޔަކު ހޯދަން ޖަނަވަރީގައި އިއުލާން ވެސް ކުރިއެވެ.

އެކަމަކު މިއަދާ ހަމައަށް، އެތެރޭގެ ބާޒާރަށް ޓީބިލު ވިއްކައިގެން ލިބުނު މަދު ފައިސާކޮޅާއި މެއި މަހުގެ ތެރޭގައި ރާއްޖޭގެ ވިޔަފާރި ބޭންކަކުން ނަގާފައިވާ 432 މިލިއަން ރުފިޔާގެ ލޯނެއް ފިޔަވައި އިތުރު ފައިސާއެއް ނުލިބެ އެވެ. މިއާއެކީ ބަޖެޓުން ހަރަދުކުރާނެ ޖާގަ ކުޑަވެ ސަރުކާރަށް ވަނީ އެކި ދިމަދިމާލުން ހަރަދުތައް ކުޑަކުރަން މަޖުބޫރުވެފައެވެ.

ހާމަކަން ބޮޑު ފޮރުވުމެއް ނެތް ސަރުކާރެއް ހިންގާނެ ކަމުގެ ވައުދާ އެކު އައިސް ދެން ފެނުނީ އެކަންކަން ސިއްރު ދިރުވާލަން ފެށި މަންޒަރެވެ. މައުލޫމާތު ހޯދާ ލިބިގަތުމުގެ ގާނޫނުގެ ދަށުން ހޯދަން ހުށަހަޅާ މައުލޫމާތަށްވެސް ރައީސް އޮފީހުން އިޖާބަ ނުދެއެވެ. ފެނުނީ ބަހާ އަމަލާ ދިމާނުވާ ވެރިކަމެވެ.

މައުލޫމާތު ހޯދަން ހުށަހަޅަން ނުޖެހޭ މިންވަރަށް ދައުލަތުގެ ހާމަކަން ބޮޑު ކުރާނެ ކަމަށް ވައުދުވެގެން އައިސް ފެންނަނީ ރައްޔިތުންނާ ނޫސްވެރިންވެސް މައުލޫމާތު ހޯދަން މުޅި ދައުލަތް ފަހާ ދުވަން ޖައްސާ މަންޒަރެވެ. ސިއްރު ދައުލަތެއްގެ ހުރިހާ ސިފައެއް ދަނީ ފެންނަމުންނެވެ.

އެންމެ ފުރަތަމަ ދީނާ ގައުމޭ ކިޔައިގެން އައިސް ތިބެ މުސްލިމު އަޚުންނާ އުޚުތުންނަސް ނަސްރު ދިނުމަށް ގައުމުން ކުރަން ޖެހޭ ކަންކަން ކުރުމުގައި ދަނީ ފަހަތު ފަޔަށް ބުރަވަމުންނެވެ. އެގޮތުން ސަހްޔޫނީންގެ ޕާސްޕޯޓު މަނާ ކުރަން ކެނޑިނޭޅި ދިވެހި ރައްޔިތުން ގޮވަމުން ދާއިރުވެސް މަޖިލީހުން ރައީސް އޮފީހަށް ރައީސް އޮފީހުން މަޖިލީހަށް އެ ބިލު ކިރަ ކިރާ ތިބެނީއެވެ.

މަތި ލުއި ސަރުޚާރެއްގެ ވައުދާ އެކު އައިސް އެކުލަވާލީ މުޅި ގައުމުގެ ތާރީޚުގައިވެސް އެންމެ މަތިބަރު ސަރުކާރެވެ. އެކަމުގެ ތަފްސީލުވެސް ހާމަނުކޮށް ހިފަހައްޓަމުން ދާއިރު ދަނީ އެކަމުގެ ހަގީގަތްވެސް ހާމަކުރަން ދެކޮޅު ހަދަމުންނެވެ. ބުނި އަދަދަށް ވުރެ ސިޔާސީ މުވައްޒަފުން ގިނަ ނުވާނެ ކަމަށް ސަރުކާރުން ތަކުރާރުކޮށް ބުންޏަސް، މިކަން ކަށަވަރުކުރެވޭނެ ގޮތެއް ނެތެވެ.

ކަރަދުތައް ދެކޮޅު ނުޖެހިގެން އުޅޭއިރުވެސް އެންމެ މީހަކުވެސް މަދުނުކޮށް އޮފީސްތަކުގައި ޖާގަ ނެތް މިންވަރުންވެސް ޔުސޭ ޖަޕާނު މީހުން ޒޫ ބަލަން ގެންދިޔަހެން، އަށި މަތީ މަސް އަތުރާލައިގެން އޮފީސްތައް ތޮއްޖެހިފައެވެ.

ރާއްޖެއަކީ ފުދުންތެރި އަމިއްލަ ފައިމައްޗަށް ތެދުވާނެ ގައުމަކަށް ހަދާނެ ކަމަސް ބުނެ އައިސް ގައުމުގައި އޮތް އާމްދަނި ވަންނަ އެންމެ ބޮޑު ދެ ސިނާއަތް ހުށަހެޅީ މަރުގެ ތުންފަތް މައްޗަށެވެ. މަސްވެރިންނަށް ފައިސާ ނުދީ ވެރިން ނާޗަރަންގީ ކުޅުމާ ޑިއިވިންއަށް ދިއުމުގައި ހޭދަކުރި އިރު މަސްވެރިކަމުގެ ސިނާއަތް އޮތީ ވެންޓިލެޓަރުގައެވެ. 20 ރުފިޔާއަށް ވުރެ މަސް ގަންނަ އަގު ދަށް ނުކުރާނެ ކަމަށް ބުނެ އައިސް އެ ވައުދާ ވެސް ޚިލާފުވިއެވެ.

ފަތުރިވެރިކަމުގެ ސިނާއަތް އެކަމާ ހަވާލުކުރި ނާގާބިލު ވަޒީރަކާ އެމްޑީއަކާ އެކު މުޅީ ސިނާއަތް ހަލާުވެ ޚަރާބުވެއްޖެއެވެ. ފަތުރުވެރިން އައުން އިތުރުކުރާނެ ގޮތެއް ނުހޯދާ ވަޒީރު އުޅުއްވނީ އިނގިރޭސި ދަސްކުރުމުގެ ހަ މަސް ދުވަހުގެ ކޯހެއްގައެވެ. ނަމަވެސް އިގްތިސޯދު ކިޔަވައި ދެއްވަނީ ބައްޕަ ހިސާބު ޖެހުމުންނެވެ.

ބޯހިޔާ ވަހިކަމުގެ ފުރިހަމަ ހައްލު ހޯދާނީ މި ވެރިކަމުގައި ކަމަށް ބުނެ އައިސް 8 މަސް ވެގެން ދިޔައިރުވެސް ކުރީ ސަރުކާރުން އަދި ކޮންމެ ގޮތަކަށް ދިން ނަމަވެސް ދީފައިވާ ބޮހިޔާވަހިކަން ހަވާލުކޮށްނުލެވެއެވެ.

ފުށިދިއްގަރުފަޅު ހިއްކުމުގެ މަސައްކަތް ފެށީ މަޖިލީހަށް ގޮންޖަހައި ދައުލަތުގެ ބަޖެޓުން ލޯލާރިއެއްވެސް ނުދާނެ ކަމަށް ވިދާޅުވުމަށް ފަހު އެވެ. އެ މަޝްރޫއު ފެށީ، ސްރީ ލަންކާގެ ކެޕިޓަލް މެރިން އެންޑު ކޮންސްޓަރަކްޝަން ކޮމްޕެނީ (ސީއެމްސީސީ) ކުންފުންޏަށް ހުޅުމާލެއިން 10 ހެކްޓަރު އަދި ރަސްމާލެއިން 60 ހެކްޓަރު ލިބޭ ގޮތަށެވެ. ބިން ހިއްކުމުގެ މަސައްކަތް ފުރަތަމަ ހަފުތާއަށް ފަހު މަޑުޖެހުނެވެ. އޭގެ ފަހުން މި މަހު 77 މިލިއަން ރުފިޔާ ދީގެން މަޝްރޫއުގެ ފުރަތަމަ ސެގްމެންޓު ހިއްކަން އަނެއްކާވެސް ފަށައިފިޔޯލައެވެ.

މިހެން ގޮސް ކިޔާފައި ނުކިޔާނެ ވާހަކައެއް ނެތެވެ. މެޑަލް ޖެހި "މުއިއްޒު ސްޕީޑު" ކަންޒު ކަހަނބު ސްޕީޑަށް ބަދަލުވެ މުޅި ގައުމު ހިންގުން ހުއްޓިއްޖެއެވެ. ސަރުކާރަށް 8 މަސްފުރުނުއިރު ދުވެލި ހުރީ ދަތްގަނޑުގެ ތިރީ ފިތުގައޭ ބުނުމކީ ދޮގަކަށް ނުވާނެއެވެ. ދުވެއްޔެއް ނެތި މިސްރާބު ގެއްލިފައިވާ އޮޑިއެކެވެ.