އިދިކޮޅު އެމްޑީޕީއާއި އެ ޕާޓީން ވަކިވެވަޑައިގެންނެވި މެންބަރުންތަކެއް އުފެއްދި ދަ ޑިމޮކްރެޓްސް ޕާޓީ ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރާ ދެކޮޅަށް މަސައްކަތްކުރަން ނިންމައިފައިވާކަން ހާމަވެއްޖެއެވެ.

ދެ ޕާޓީގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޗެއާޕާސަން ފައްޔާޒު އަލީ ފާހަގަކުރެއްވި ގޮތުގައި އެމްޑީޕީއާއި ދަ ޑިމޮކްރެޓްސް ގުޅިގެން ސަރުކާރު "ހަންމަތަ"ކުރަން މަޖިލީހުގެ ތެރެއިން މަސައްކަތްކުރުމަށް ނިންމީ އެ ދެ ޕާޓީއިން ހިއްސާކުރާ ކަންބޮޑުވުންތަކެއް ހުރުމުން ކަމަށެވެ.

އެ ކަންބޮޑުވުންތަކުގެ ތެރެއިން ފައްޔާޒު ފާހަގަކުރެއްވި ފުރަތަމަ ކަމަކީ ރާއްޖެއާއި އިންޑިއާގެ ދެމެދުގައި އޮތް ގުޅުން ހީނަރުވެފައި އޮތުމެވެ.

މީގެ އިތުރުން ފައްޔާޒް ވަނީ ރައީސް މުއިއްޒުގެ ސަރުކާރުން ޗައިނާއާއެކު ބާއްވަމުނން އަންނަ ގުޅުމަކީވެސް ވަރަށް ނުރައްކާތެރި ކަމެއްގެ ގޮތުގައި ފާހަގަކުރައްވާފައެވެ.

ސަރުކާރުގެ ސިިޔާސަތުތަކުގެ ސަބަބުން މި ސަރަހައްދުން ބޭރުގެ ބޮޑެތި ބައެއް ބާރުތަކުގެ ސަމާލުކަން މި ސަރަހައްދަށް ހުއްޓެމުންދާކަމަށާއި، އެކަމަކީ ރާއްޖޭގެ މިނިވަންކަމާއި ސިޔާދަތަށް ނޭދެވޭ އަސަރުކުރާނެ ކަންތައްތަކެއް ކަމުގައި ފައްޔާޒުވަނީ ފާހަގަކުރައްވާފައެވެ.

ސަރުކާރުގެ މަސައްކަތްތައް މޮނީޓާކުރުމުގެ އިތުރަށް ރާއްޖޭގެ ޑިމޮކްރެޓިކް ނިޒާމު ހަރުދަނާކުރުމަށް ރާއްޖޭގެ ޤާނޫނީ ނިޒާމަށް ގެންނަންޖެހޭ ބަދަލުތައް ރައްޔިތުންގެ މަޖިލީހުގެ ތެރެއިން ގެނައުމަށް ދެ ޕާޓީ ގުޅިގެން މަސައްކަތްކުރުމަށް ނިންމާފައިވާކަމަށް ފައްޔާޒު ވިދާޅުވިއެވެ.

އެމްޑީޕީއާއި ޑިމޮކްރެޓްސްގެ ފަރާތުން ސަރުކާރާއި ދެކޮޅަށް މަސައްކަތް ކުރަން ނިންމައިފައިވާ އިރު، މިފަހުން މާލެ ސިޓީ ކައުންސިލްގެ މޭޔަރަކަށް އައްޔަން ކުރެވުނު އާދަމް އާޒިމް ވަނީ ސަރުކާރާއި ކޯޅޭނެ ފުރުސަތެއް ނުދެއްވާނެ ކަމަށް ވިދާޅުވެފައެވެ.