ޚަރަދު ކުޑަކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރޭގައި މިފްކޯގެ ގިނަ މުވައްޒަފުންތަކެއް ވަޒީފާއިން ކަނޑާލަން އެ ކުންފުނިން ނިންމާފައިވާ ކަމަށް ހާމަކޮށްފިއެވެ.

އެކަން ހާމަކުރީ ބުރާސްފަތި ދުވަހު މިފްކޯ ހިންގުމާއި ހަވާލުވެ ހުންނެވި ސީއެފްއޯ އިލްޔާސް ހަނީފް ސޮއިކުރައްވާ ހުރިހާ މުވައްޒަފުންނަށް ފޮނުވި މެމޯއެއްގައެވެ.

މައުލޫމާތު ލިބިފައިވާ ގޮތުގައި ފިނޭންސް މިނިސްޓްރީ އާއި މިފްކޯ ގުޅިގެން މިފްކޯގެ އަށް މުވައްޒަފުން ބޭނުންވާ މިންވަރަށް މުވައްޒަފުންގެ އަދަދު ހަމަކޮށް، ހިންގުން ހަރުދަނާކުރަން ނިންމާފައިވާ ކަމަށެވެ. އެކަން ކުރަނީ މިފްކޯ އެފިޝިއެންސީ އެކްސަރސައިޒްގެ ނަމުގައި ކަަމަށް އެ މެމޯގައިވެއެވެ. އެ މެމޯގައި ވަނީ 17 ޖުލައިގައި މިފްކޯގެ ޑިރެކްޓަރުންގެ ބޯޑުން ނިންމާފައިވާ ނިންމުންތައް މުވައްޒަފުންނަށް އަންގާފައެވެ.

އެ މެމޯގައި ބުނެފައި ވަނީ ސީނިއަރ އަދި މިޑްލް މެނޭޖްމެންޓްގެ ވެރިންގެ އަސާސީ މުސާރަ 20 އިންސައްތަ ކުޑަކުރަން ނިންމާފައިވާ ކަމަށެވެ.

އަދި މުވައްޒަފުންގެ މުސާރައިގެ އޮނިގަނޑުގެ ފަރަގު ކުޑަކުރުމަށް ހުރިހާ ޑިޕާޓްމެންޓެއްގެ މުސާރައިގެ އޮނިގަނޑު އެއް ހަމަ ކުރާނެ ކަމަށް ވެސް ވަނީ ބުނެފައެވެ. މީގެ އިތުރުން ޕަރފޯމެންސް އަށް ބެލުމަށް ފަހު ވަކިކުރަން ޖެހޭ މުވައްޒަފުން ވަކިކުރާނެ ކަމަށާއި ޕްރޮބޭޝަންގައި ތިބި މުވައްޒަފުންގެ ތެރެއިން ކޮންމެހެން ބޭނުންވާ މުވައްޒަފުން ނޫން މީހުން ވަކިކުރުމަށް ވެސް ވަނީ ނިންމާފައެވެ.

ހަމައެހެންމެ 65 އަހަރު ވުމަށް ފަހު ކޮންޓްރެކްޓް މުވައްޒަފުންގެ ގޮތުގައި ތިބި މުވައްޒަފުން 3 މަސް ދުވަހުގެ ނޯޓިސް ދިނުމަށް ފަހު ކަނޑާލުމާއި ޚާއްސަ ހާލަތުގައި ނޫނީ 65 އަހަރު ވުމަށް ފަހު ކޮންޓްރެކްޓް މުވައްޒަފުންގެ ގޮތުގައި ނުނެގުމަށް ވަނީ ނިންމާފައެވެ.

ޚަރަދުކުޑަ ކުރުމުގެ ނަމުގައި ރައްޔިތުންނަށް ހުރިހާ ނިކަމެތި ކަމެއް ލިބެމުން އަންނައިރު، މިފަދައިން ނަގަމުންދާ ފިޔަވަޅުތަކުން ވަޒީފާ ގެއްލުނަސް ކެތްތެރިވުމަށް ސަރުކާރުގެ އިސްވެރިން އަންނަނީ ބުނެފައިވާތީ ގިނަ ބަޔެއްގެ ފާޑުކިޔުން ވަރަށް ބޮޑަށް އަމާޒުވެފައިވެއެވެ.