މާލޭ ސިޓީ ކައުންސިލުގެ ހުސްވެފައިވާ ތިން ގޮޮނޑިއަށާ އަދި އިތުރު ގޮނޑިތަކަކަށް ކައުންސިލަރުން އިންތިޚާބުކުރުމަށް ބޭއްވި ބައި-އިލެކްޝަންތަކުން 5 ގޮނޑި ވެރިކަން ކުރާ ޕީއެންސީއިން ކާމިޔާބުކޮށްފިއެވެ.

އެގޮތުން މާލޭ ސިޓީ ކައުންސިލުގެ ހުސްވެފައިވާ ތިން ގޮޮނޑިއަށާ ފ. ބިލެތްދޫ ކައުންސިލްގެ ރައީސާއި، ކުޅުދުއްފުށި ސިޓީ ކައުންސިލްގެ ކުޅުދުއްފުށި އުތުރު ދާއިރާ ކައުންސިލް މެންބަރު އަދި ރ. ރަސްމާދޫ ކައުންސިލްގެ އަންހެން މެންބަރު ހޮވަން ބޭއްވި ބައި-އިލެކްޝަންގެ ވޯޓުލާ ވަގުތު ހަމަވިއިރު އިންތިހާބުގައި ވޯޓުލާފައިވަނީ މި އިންތިހާބުގައި ވޯޓުލުމުގެ ހައްގު ލިބިގެންވާ މީހުންގެ ތެރެއިން 3،528 މީހުންނެވެ. އެއީ ހުރިހާ ގޮނޑިތަކުގެ އިންތިހާބަށް ވޯޓުލީ މީހުންގެ ޖުމްލަ އަދަދެވެ.

މި އިންތިހާބުގައި ވޯޓުލުމުގެ ޙައްގު 13،112 މީހުންނަށް ލިބިފައިވެއެވެ. އެހެންކަމުން މިއަދުގެ ބައި އިލެކްޝަންގައި ހުރިހާ ދާއިރާތައް އެއްކޮލުމުން ވޯޓުލީ މީހުންގެ އިން ސައްތައަކީ 26.91 އެކެވެ.

ނަމަވެސް ވެރިކަން ކުރާ ޕީއެންސީ އިން ގެންދަނީ އެ ޕާޓީއަށް ބޮޑު ކާޟިޔާބީ އެއް ލިބުނުކަމަށް ބުނަމުންނެވެ. މިއަދު ބޭއްވި 6 ދާއިރާއެއްގެ ބައި އިލެކްޝަންގެ 5 ގޮނޑި ޕީއެންސީއަށް ލިބިފައިވާއިރު، އޭގެ ތެރޭގައި ހިމެނެނީ މާލެ ސިޓީގެ ކައުންސިލުން ހުސްވެފައި ހުރި 3 ގޮނޑިއާ ބިލެތްދޫ ކައުންސިލް ރައީސްގެ ގޮނޑީގެ އިތުރުން ކުޅުދުއްފުށީ އުތުރު ދާއިރާގެ ކައުންސިލް ގޮނޑިއެވެ.