ދިވެހިރާއްޖޭގެ އިގްތިޞާދީ ހާލަތު އަތްނުފޯރާ ފަށުގައި ހުރެގެން ބަޔަކު މީހުން އިދިކޮޅުގައި އޮވެ ތެޅިބޭލި މަންޒަރާއި އަޑު ވާނީ ގިނަ ބަޔަކަށް ފެނި އަޑުއިވިފައެވެ. މިވެރިންނަށް ވެރިކަން ލިބުނު އިރު ރާއްޖޭގެ އިގްތިޞާދީ ހާލަތު އޮތީ އަނދަވަޅެއްގައި ކަމީ އެވެރިންނަަށް ނޭނގޭ ކަމެއްވެސް ނޫނެވެ.

ރައްޔިތުން ކައިރިއަށް ވޯޓު ހޯދުމުގެ ބޭނުމުގައި ގޮސް ދެއްކެވި ވާހަކަތަކަކީ މިއަދު އޭގައި އެއްވެސް ހަގީގަތެއް އެކުލެވޭ ވާހަކަތަކެއް ނޫންކަމީ އެއްވެސް ޝައްކެއް އޮތްކަމެއް ނޫނެވެ. ކައިރި އަވައްޓެރި ގައުމުތަކުން "ގްރީން ސިގްނަލް" ލިބިފައިވާކަމަށާއި އެހެންކަމުން އެ ގައުމުތަކުގެ އެހީގައި ވެއްޓިފައި އޮތް އިގްތިޞާދީ ހާލަތުން އަރައިގަނެވޭނެ ކަމުގެ ޔަގީންކަން ވެސް އެ ވެރިން ދިނީ ހަމަ ހިތައް އެއްޗެއް އަރުވާ ވެސް ނުލައެވެ.

އާރާއި ބާރާއި ޝާނާ ޝައުކަތު ލިބުނު ހިސާބުން ވެރިންގެ ކުލަވަރު ބަދަލުވީ އިސާހިތަކުއެވެ. އިގްތިޞާދީ ހާލަތު އޮތް ގޮތް ބަލާލުމެއްނެތި އުޅުއްވީ އަމިއްލަ އެދުމައިގެންނެވެ. ވެރިކަމާ ހަވާލުވީ ގައިމު އެ ހުރިހާ ކަމަކަށް ހައްލު ގެނައުމުގެ ބޭނުމުގައެވެ. ނަމަވެސް ވެރިކަން ލިބުމުން ދެން ބޭނުންވީ އިގްތިޞާދީ ހާލަތު އޮތްގޮތައް ބާއްވާށެވެ. ކަންވެ ނިމުނީ ވެސް ހަމަ އެ ބީދާއިންނެވެ.

ނުކަތާ ވަރަށް ބޭކާރު ޚަރަދުކޮށް، ސިޔާސީ މުވައްޒަފުން އައްޔަންކޮށް، ބޮޑު މުސާރަ ރައްޔިތުންގެ ފައިސާއިން ދޭން ފެށީ އެއްވެސް މަސައްކަތެއް ނުކޮށް ރީތިކޮށް ތިއްބަވާ ފަރާތްތަކަށެވެ. ކުއްލިއަކަށް މި ޚަރަދުތައް ކުރިޔަށް ގެންދިޔުމަށް ފައިސާ ނެތް ކަން އިހުސާސްވިއެވެ، ވެރިން ތެޅި ބާލަން ފެށީ ހަގީގަތުގައި އެ ހިސާބުންނެވެ. ވެރިކަމަށް 6 މަސްވި އިރު ވެސް ޚަރަދު ބޮޑު ވާހަކަ އެއް ނުދައްކަވައެވެ. ނަމަވެސް 7 ވަނަ މަހު ދެން ކުއްލިއަކަށް ދައްކަން ފެށީ ކޮންމެވެސް "ހިތި ބޭހެއް" ބޯން ޖެހިދާނެތީ އެ ވާހަކައެވެ. ހަގީގަތުގައި ވެސް އެ ހިތި ބޭހެއް ބޯން ޖެހޭނީ ނިކަމެތި ރައްޔިތު މީހާއެވެ. މި ވެރިންނަަށް ކީއްތޯ؟

ހިތި ބޭހެއްގެ ވާހަކަ ރަނގަޅަށް ދައްކާ ނުނިމެގެން އުޅެނިކޮށް ދެން އިވުނީ ޚަރަދު ކުޑަކުރަން ގަރުދިޔަ އާއި ބަތާ ކާން ރައްޔިތުން ތިރިވާންޖެހެޔޭ ވިދާޅުވެ ރައީސް އޮފީހުގެ މިނިސްޓަރެއް ވާހަކަ ދެއްކެވި އަޑެވެ. ރަނގަޅެވެ. ގަރުދިޔަ އާއި ބަތް ވެސް ކާންވީއެވެ. ޚަރަދު ކުޑަ ވާނަމަ ރަނގަޅެވެ. ވެރިންގެ ވާހަކަތަކުން ހީވަނީ ޚަރަދު ބޮޑީ ނިކަމެތި ރައްޔިތުންގެހެންނެެވެ. ނަމަވެސް ހަގީގަތުގައި ޚަރަދު ބޮޑީ ސަރުކާރުގެއެވެ.

ގަރުދިޔަ އާއި ބަތް ވެސް ރައްޔިތުން ކަނީއެވެ. ޚަރަދަށް ވެސް ބަލަނީ އެވެ. ޚަރަދުތައް ކުޑަކުރަން ރައްޔިތުން ވަރަށް މަސައްކަތް އެބަކުރެއެވެ. ނަމަވެސް ސަރުކާރުން ކުރަނީ ކޮން ކަމެއްތޯ؟ ޚަރަދު ކުޑަކުރުމުގެ ސިޔާސަތުގެ ދަށުން އަޅަން ބުނި ފިޔަވަޅުތަކެއް އެޅިއްޖެތޯ؟ ޚަރަދު ކުޑަވެއްޖެތޯ؟ މިއީ އުފެދޭ ލައްކަ ސުވާލެވެ.