މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވެލާނާ އިންޓަރނޭޝަނަލް އެއަރޕޯޓުގައި ފަޔަރފައިޓަރުން ތަމްރީނުކުރުމަށް ހިންގާ ބޭސިކް ފަޔަރފައިޓަރ ކޯހުގެ 29 ވަނަ ބެޗް ފަށައިފިއެވެ.
މި ކޯހަކީ މޯލްޑިވްސް ސިވިލް އޭވިއޭޝަން އޮތޯރިޓީން ހުއްދަ ދީފައިވާ 43 ދުވަހުގެ ކޯހެކެވެ.
މި ކޯހުގައި 12 ފަޔަރފައިޓަރުން ބައިވެރިވެ، ވައިގެ ބަނދަރުގައި އަލިފާނުގެ ހާދިސާތަކާއި މަތިންދާބޯޓުތަކުގައި ދިމާވާ ކުއްލި ނުރައްކަލުގެ ހާދިސާތަކަށް އިޖާބަދިނުމަށް ތަމްރީނު ކުރެވޭނެއެވެ. މި ކޯހަކީ ވައިގެ ދަތުރުފަތުރުގެ ސަލާމަތާއި ރައްކާތެރިކަމަށް ވަރަށް މުހިންމު ކޯހެކެވެ.
އެމްއޭސީއެލްއިން މައުލޫމާތު ދިން ގޮތުގައި، ވެލާނާ އިންޓަރނޭޝަނަލް އެއަރޕޯޓުގައި އެންމެ ޒަމާނީ ވަސީލަތްތަކާއެކު އައު ފަޔަރ ސްޓޭޝަނެއް ވަނީ ހުޅުވާފައެވެ. މިހާރު ދެ ފަޔަރ ސްޓޭޝަން ހިންގަމުންދާތީ، ކުއްލި ނުރައްކަލުގެ ހާދިސާތަކަށް އަވަހަށް އަދި ހަރުދަނާކަމާއެކު އިޖާބަދެވޭނެ ކަމަށްވެސް އެމްއޭސީއެލްއިން ބުނެފައިވެއެވެ.
