

ހުޅުމާލޭގައި އަލިފާނުގެ ހާދިސާއެއް ހިނގާ ސިފައިން ހަރަކާތްތެރިވަމުން ގެންދާކަން ހާމަވެއްޖެއެވެ.
އެމްއެންޑީއެފްގެ މީޑިޔާ ގްރޫޕުގައި ނޫސްވެރިއަކު ކުރި ސުވާލަކަށް ޖަވާބު ދެމުން މީޑިޔާ އޮފިސަރު ވިދާޅުވެފައިވަނީ ހުޅުމާލެ ފޭސް 2 ގައި އަލިފާނުގެ ހާދިސާއެއް ހިނގައިގެން އުޅޭކަމުގެ މައުލޫމާތު ލިބި މިހާރު ފަޔަރ އެންޑް ރެސްކިއުއިން އެ ސަރަހައްދުގައި ހަރަކާތްތެރިވަމުން ގެންދާ ކަމަށެވެ.
އެމްއެންޑީއެފުން ވިދާޅުވި ގޮތުގައި އަލިފާނުގެ ހާދިސާ ހިނގީ ހަވީރު 3:30 ހާއިރު ހުޅުމާލެ ތިން ވަނަ ފިޔަވަހީގައި ހުންނަ ރެނާޓަސް ސައިޓުގައެވެ. އެ އަލިފާންގަނޑު ކޮންޓްރޯލްވެފައިވާ އިރު، އެއްވެސް މީހަކަށް އަނިޔާއެއް ލިބިފައި ނުވާ ކަމަށް ވެސް އެމްއެންޑީއެފުން ވިދާޅުވިއެވެ.
އެމްއެންޑީއެފުން ވިދާޅުވި ގޮތުގައި އާރުއޯ ޕްލާންޓެއްގައި ރޯވާން ދިމާވީ ވެލްޑިން ކުރުމުގެ ތެރޭގައެވެ. އަލިފާންގަނޑު ޖެހިގެން ހުރި ވެއާރހައުސަކަށް ފެތުރުނެވެ. ނަމަވެސް އަލިފާންގަނޑު މިހާރު އެއްކޮށް ނިއްވާލެވިފައިވާއިރު، އަލިފާންގަނޑު އެއްކޮށް ނިއްވާލަން ގަޑިއިރެއްހާ އިރު ނެގިއެވެ.