އާދެ، 13 ފެބްރުއަރީ 2024 ގައި ދުބާއީގައި ބޭއްވި އިންވެސްޓް މޯލްޑިވްސްގެ ހަވާސާގައި ނޫސްވެރިންނާ ވާހަކަ ދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ "ކުރިއަށް އޮތް ދެތިން ހަތަރު މަހެއްގެ ތެރޭގައި ޑޮލަރު ސިޓިއުޝަން ހަމައަކަށް އެޅިގެންދާނެ" ކަމަށެވެ.

ފެބްރުއަރީ، މާޗް، އޭޕްރިލް، މެއި، އަދި ޖޫން ނިމި ޖުލައި މަސް ވެސް ނިމުމަކާ ހަމަޔަށް އަތުވެއްޖެއެވެ. އަޅުގަނޑު ނޫނަސް ރާއްޖޭގެ ގިނަ ބަޔަކު އަދިވެސް އިންތިޒާރު ކުރަމުން އެ ދަނީ ޑޮލަރު ބޭންކު ރޭޓްގައި ގަންނަން ލިބޭނެ ދުވަހަކަށެވެ.

ވާނީވެސް އެހެންތާއެވެ. މި ސަރުކާރުގެ އިކޮނޮމިކް މިނިސްޓާރ މުހައްމަދު ސައީދު އިންޓަވިޔުގައި އެފަދައިން "ދެތިން މަހޭ" ވިދާޅުވީމާ ރައްޔިތުންގެ އުންމީދު އައު ނުވާނެ ގޮތެއް ނޯންނާނެތާއެވެ. ނަމަވެސް ކުރާނެ ކަމެއްނެތެވެ.

ޑޮލަރުގެ އަގު ވަނީ ދުވަހުން ދުވަހަށް ކަޅު ބާޒާރުގައި ބޮޑެވެ. 17 ރުފިޔާ އިން 18 ރުފިޔާ އަށް ޖަމްޕު ޖަހައި މިހާރު ޑޮލަރެއްގެ އަގު ކަޅު ބާޒާރުގައި ހުރީ 18.25 ރުފިޔާއަށެވެ. ހެޔޮ ވާނެ ކަމަށް މިނިސްޓާރ ސައީދު ވިދާޅުވި ޑޮލަރުގެ އަގެއް ހެޔޮވާ މަންޒަރެއް ނުފެނެއެވެ.

މަޖިލިސް ކެމްޕޭނު ތެރެއިން ފުވައްމުލަކުގައި އޮތް ޖަލްސާއެއްގައި ވާހަަކަ ދައްކަވަމުން ރައީސް މުއިއްޒު ވިދާޅުވީ ރާއްޖޭގެ އިގުތިސާދު ދަނީ ރަނގަޅުވަމުން ކަމަށާއި ސަބަބަކީ އިގުތިސާދީ މިނިވަންކަން ހޯދައިދިނުމަށް މި ސަރުކާރުން ކުރަމުން ގެންދާ މަސައްކަތް ކަމަށެވެ. އަސްތާވާ ހާދަ މަސައްކަތެއް ރައީސް މީހާ އަދި މިނިސްޓަރު ޑޮލަރު އަގުހެޔޮ ކުރުމަށް އެބަ ކުރައްވައޭ އޭރުގައި ހިތައް އެރިއެވެ.

ޑޮލަރުގެ އަގު އެއްވަރެއްގައި ހިފެހެއްޓިފައި ހުންނާނެ ކަމަށް ވިދާޅުވެ ރައީސް މުއިއްޒު ވަނީ އެކަމުގެ ސަބަބަކީ ވެސް މި ސަރުކާރުން އަޅަމުން ގެންދާ އިގުތިސާދީ ރަނގަޅު ފިޔަވަޅުތައް ކަމަށް ވިދާޅުވިއެވެ. އެކަން މިކަން ކޮށްދެއްވާނެ ކަމަށް ވައުދުވެ، ދެން ފެންނަނީ އަމިއްލަފުޅަށް ތައުރީފް ކުރައްވާ މަންޒަރެވެ.

ޑޮލަރުގެ އަގު އިންތިހާއަށް މައްޗައްކަށް ނާރާނެކަމަށާއި ހުންނާނީ ހިފެހިއްޓިފައިކަމަށާއި ދާނީ ކުރިއަށްވުރެ ދަށަށް ކަމަށް ވެސް ފުވައްމުލަކުގައި އޮތް ޖަލްސާގައި ރައީސް މުއިއްޒު ވިދާޅުވިއެެވެ.

ރައީސް މިހާ އެފަދައިން ވިދާޅުވި ނަމަވެސް ޖޫން މަހުގެ އެއްވަނަ ދުވަހު އޮތް ބޭންކް އޮފް މޯލްޑިވްސްގެ އަހަރީ އާންމު ޖަލްސާގައި ވާހަކަ ދައްކަވަމުން އެ ބޭންކުގެ ސީއީއޯ ކާލް ސްޓުމްކަ ވިދާޅުވީ ކަސްޓަމަރުންނާއި މަރުކަޒީ ބޭންކް، އެމްއެމްއޭ އިން ބީއެމްއެލްއަށް ގަންނަން ލިބުނު ޑޮލަރުގެ އަދަދަށްވުރެ އިތުރަށް 333 މިލިއަން ޑޮލަރު އެ ބޭންކުން ވިއްކާފައިވާ ކަމަށާއި އެއީ ދެމެހެއްޓޭނެ ކަމެއް ނޫން ކަމަށެވެ.

ބޭންކަށް ގަންނަން ލިބެންނެތް އެއްޗެއް ވިއްކަމުން ދިޔުމަކީ ދެމެހެއްޓެނެވި ކަމަކަށް ނުވާ ހިނދު އެ މަގު ފަހިވަންދެން ބޭންކުގެ މާލީ ހާލަތާއި ރިސްކްތަކަށް ހުށަހެޅޭ މިންވަރު ކުޑަކުރުމަށްޓަކައި އުދަނގޫ ނިންމުންތަކެއް ނިންމަން އެ ބޭންކަށް މަޖުބޫރުވާކަމަށް ބީއެމްއެލްގެ އަހަރީ ރިޕޯޓުގައި ވެސް ވަނީ ފާހަގަކޮށްފައެވެ.

ޑޮލަރުގެ އަގު އުފުލުނީ ޑޮލަރުގެ އަގު އުފުލިގެން އުޅެން ދެން ނުޖެހޭނެ ކަމަށާއި ދެން ފެންނާނީ ޑޮލަރުގެ އަގު ހެޔޮވަމުން ދާތަން ކަމަށް ރައީސް ޑރ. މުހައްމަދު މުއިއްޒު ވިދާޅުވިތާ ދެ މަސް ދުވަސް ވެސް ނުވަނީހެނެވެ.

ކުރިޔަށް އޮތް ދެތިން މަސް ތެރޭ ޑޮލަރުގެ އަގު ހެޔޮ ވާނެކަމަށް މިނިސްޓާރ ސައީދު ވިދާޅުވިތާ ދެތިން މަސް ފަހުން މި ފެނުނީ ޑޮލަރުގެ އަގު ބޮޑުވި މަންޒަރެވެ.

މިނިސްޓާރ ސައީދު ހީފުޅު ކުރައްވަނީ ޑޮލަރަކީ ފިނިފެންމަލުގެ ބަގީޗާ ގަހަކުން ހިލޭ ބިނދެލެވޭނެ އެއްޗެއް ކަމަށްތޯ؟