ދައުރު ނިމެންދެން މި ސަރުކާރުން އުޅޭނީ ކުރީ ސަރުކާރުގެ މަސައްކަތްތަކުން ކްރެޑިޓް ނެގުމުގައި ކަމަށް ކުރީގެ މާލީ ވަޒީރު އިބްރާހިމް އަމީރު ވިދާޅުވެއްޖެއެވެ.
އަމީރު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
އެގޮތުން މި ސަރުކާރުގެ ސިޔާސަތުތަކަށް ފާޑު ވިދާޅުވަމުން އަމީރު ވިދާޅުވީ މި ދައުރުގައި ބާކީ އޮތް 4 އަހަރު ވެސް މި ސަރުކާރުގެ އިސްބޭފުޅުން އުޅުއްވާނީ ރައީސް ޞާލިޙްގެ ސަރުކާރުން ފަށާފައިވާ މަޝްރޫޢުތައް ނިމުމުން އެ މަޝްރޫޢުތަކުގެ ރިބަން ކަނޑައި އިފްތިތާހް ކުރުމުގައި ކަމަށެވެ.
އަދި މި ސަރުކާރަށް އައު މަޝްރޫޢެއް ނުފެށޭނެ ކަމަށާއި އެފަދަ ވިސްނުމެއް ވެސް މި ސަރުކާރުގެ އިސްބޭފުޅުންގެ ކިބައިގައި ނެތްކަމަށް އަމީރު ވިދާޅުވިއެވެ.
މި ސަރުކާރުން އައު މަސައްކަތެއް ނުކުރާނެ ކަމަށް އަމީރު ވިދާޅުވެފައިވާއިރު ޔޫރަޕްގެ ގައުމުތަކުގައި އުފައްދާ ކޮލިޓީ ބޭސް ރާއްޖޭން ލިބޭނެ އިންތިޒާމު ހަމަޖެއްސުމުގެ މަސައްކަތްތައް ނިންމާފައިވަނީ ކުރީ ސަރުކާރުން ކަމަށް އަމީރުވަނީ ވިދާޅުވެފައެވެ.
އެގޮތުން އެކަމަކީ ކުރީ ސަރުކާރުން އެއްބަސްވުމުގައި ސޮއިކޮށް ނިމިފައިވާ ކަމެއްކަމަށް އަމީރު ވިދާޅުވެފައިވެއެވެ.
އޭގެއިތުރުން އޭރު ސަރުކާރުން އެކަމުގެ އެއްބަސްވުމުގައި ސޮއިކުރި ފޮޓޯތަކާއި އެ ހަބަރު ނޫސްތަކުގައި ޝާއިއުކޮށްފައިވާ ލިންކުތައް ވެސް އަމީރު ވަނީ މީސްމީޑީއާގައި ޙިއްސާކޮށްފައެވެ.
