އަންނަ މާޗު މަހު ގައި ބާއްވާ ރައްޔިތުންގެ މަޖިލީހުގެ އިންތިހާބަށް މާލޭގެ ދެ ސަރަހައްދެއްގައި ޓެންޓު ޖަހައިގެން 40 ވޯޓުލާ މަރުކަޒު ތައްޔާރު ކޮށްދޭނެ ފަރާތެއް ހޯދަން އިލެކްޝަންސް ކޮމިޝަން (އީސީ) އިން އިއުލާންކޮށްފި އެވެ.

އީސީގެ އިއުލާނުގައި ބުނެފައިވަނީ މި ފުރުސަތު ދޭނީ ބީލަން އުސޫލުން ކަމަށެވެ.

އެކަމަށް ޝައުގުވެރިވާ ފަރާތްތަކަށް ބިޑް ހުށަހެޅުމުގެ ފުރުސަތު އަންނަ މަހުގެ ހަތަރަކާ ހަމައަށް އޮންނާނެ ކަމަށާއި ބީލަން ހުޅުވުން ވެސް އޮންނާނީ އެ ދުވަހު ކަމަށް އެ އިއުލާނުގައި ވެ އެވެ.

މަޖިލިސް އިންތިހާބު ބާއްވަނީ ރޯދަ މަހުގެ ފުރަތަމަ ހަފުތާގައިކަން ފާހަގަކޮށްލެވެއެވެ. އެއީ ސްކޫލްތަކުގެ އިމްތިހާނުތަކާ ދިމާވާ ދުވަސްވަރަށް ވާތީ، އިންތިހާބީ މަރުކަޒުތައް ހެދުމަށް ސްކޫލްތަކުގެ ހޯލުތައް ލިބުން ދަތިވާ ކަމަށް އީސީން ކުރިން ވެސް ބުނެފައިވެއެވެ.

މަޖިލިސް އިންތިހާބު ރޯދަ މަހުގައި ބާއްވާތީ ބައެއް ޕާޓީތަކުން ވަނީ ރޯދަ މަހުގެ ފަހުން އެ އިންތިހާބު ބާއްވަން ބޭނުންވާ ކަމަށް ބުނެފަ އެވެ. އިންތިހާބު އެގޮތަށް ފަސްކުރެވޭނީ އިންތިހާބުތަކާ ބެހޭ ގާނޫނަށް އިސްލާހު ގެނެސްގެން ކަމަށް ވާތީ، އެމްޑީޕީން މިހާރު ވަނީ އެކަން ކުރަން މަޖިލީހަށް ހުށަހަޅައިފަ އެވެ.