ހުލުމާލެ އަދި މާލެ ގުޅުވާދޭ ސިނަމާލެ ބްރިޖް އިން ޓޯލް ޓެކްސް އެއް ނެގުމަށް ސަރުކާރުން ނިންމާފައިވާ ކަމަށް ސަރުކާރުން ހާމަކޮށްފައިވާ މައްސަލައިގައި ރައްޔިތުންގެ ރުޅިގަނޑު ފަޅައިގެން ދިޔުމުން ރައީސުލްޖުމްހޫރިއްޔާ ޑރ މުހައްމަދު މުއިއްޒު އެކަން އެގޮތަށް ނުކުރައްވާނެ ކަމަށް ވިދާޅުވެ ވާހަކަފުޅު ބަދަލުވުމުން ރައީސް އަބްދުﷲ ޔާމީން އަބްދުލްގައްޔޫމް ފާޑު ވިދާޅުވެއްޖެއެވެ.

ރޭ ދަ ފްރޮންޓް ޖަލްސާގެ ތެރެއިން ބައިވެރިންނާއި ވާހަކަދައްކަވަމުން ރައީސް ޔާމީން ވިދާޅުވީ ރައްޔިތުންގެ ޝަކުވާ ބޮޑުވުމުން މި ސަރުކާރުން އެފަދަ ސިޔާސަތެއް ހިންގަން އުޅުމަކީ ނާތަހުޒީބު ކަމެއް ކަމަށް މުއިއްޒު ވިދާޅުވެ ކުރިން ބުނި އެތި ކެންސަލްކޮށްފައި ކަމަށެވެ.

ނަމަވެސް ގައުމުގެ ވެރިމީހާއަށް ނޭގި ކެބިނެޓް މިނިސްޓަރުން އެވަރުގެ ބޮޑު ފިޔަވަޅެއްގެ ވާހަކަ ދައްކަވާފާނެ ކަމަށް އެމަނިކުފާނުގެ ޒަމީރު ގަބޫލުފުޅު ނުކުރައްވާކަމަށް ރައީސް ޔާމީން ފާހަގަކުރެއްވިއެވެ.

ބުރިޖްއަކީ އެންމެންވެސް ބޭނުންކުރާ އެއްޗެއްކަމާއި ބުރިޖް ދޫކޮށް އެހެން ދަތުރުފަތުރުގެ ވަސީލަތްތައް މީހުން ބޭނުން ނުކުރާ ކަމަށް ފާހަގަކޮށް، މިފަދަ ސިޔާސަތެއް ކަނޑައެޅުމުން ރައްޔިތުންގެ ކަންބޮޑުވުން ފާޅުކުރަން ފެށުމުން ރައީސް މުއިއްޒު ވަނީ އެކަމުން ބޯދަމައިގަނެފައެވެ. ރާއްޖޭގެ އިގްތިސާދީ ހާލަތު ރަނގަޅުވުމުން ނޫނީ އެފަދަ ފިޔަވަޅެއް މި ސަރުކާރުން ނާޅާނެ ކަމަށް މުއިއްޒު ވިދާޅުވިޔަސް ސިޔާސަތު އޮތީ ނިންމާފައިކަމަށް ރައީސް ވިދާޅުވިއެވެ.

މިނިސްޓަރުގެ ބަސްވެސް ކެންސަލްކޮށް ރައްޔިތުންގެ ކުރިމަތީގައި ރައީސް އަންނަނީ މިނިސްޓަރުންގެ ބަހުގެ އިތުބާރުނެތްކަން ހާމަކޮށްދެއްވަމުންނެވެ.