ގއ. ވިލިނގިލީގައި އިތުރު ފަރުވާ އަށް މާލެ ގެނައުމަށް ގިނަ ވަގުތު ނެގި އުމުރުން 13 އަހަރުގެ ފިރިހެން ކުއްޖާ ނިޔާވި މައްސަލައިގައި ހަ އިދާރާއެއްގެ ވެރިން ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީއަށް ހާޒިރުކުރަން ނިންމައިފި އެވެ.

އެ މައްސަލައިގެ އިންކުއަރީއެއް ހަދަން މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ނިންމާފައިވާއިރު، މަޖިލީހަށް ހާޒިރުކުރަން ނިންމާފައިވަނީ އާސަންދަ އާއި އެންސްޕާ އާއި ވިލިނގިލީ ހޮސްޕިޓަލާއި ހެލްތް މިނިސްޓްރީގެ އިތުރުން ޑިފެންސް މިނިސްޓްރީ އާއި ފޮރިން މިނިސްޓްރީ އެވެ.

ޑިފެންސް މިނިސްޓްރީ އާއި ފޮރިން މިނިސްޓްރީއަކީ އެ ކޮމިޓީގެ މެންޑޭޓުގައި ނުހިމެނޭ ތަންތަން ކަމުގައިވީނަމަވެސް، ހޯމަ ދުވަހު ދެ މިނިސްޓަރުން ކޮމިޓީއަށް ހާޒިރުވާން ޗިޓު ފޮނުވާފައިވާވެއެވެ.

ކޮމިޓީގެ އިންކުއަރީގައި މި މައްސަލައިގައި މޯލްޑިވިއަން އެއާލައިންގެ ފްލައިޓު ލަސްވިއިރު، އިމަޖެންސީގައި އިންޑިއާގެ ޑޯނިއާ ނުވަތަ ހެލިކޮޕްޓަރު ބޭނުން ނުކުރި ސަބަބެއް ސާފުކުރަން ވަނީ ނިންމައިފަ އެވެ.

ކުއްޖާގެ މަރުގައި ސަރުކާރުން އިހުމާލުވެފައިވާކަމަށް ގިނަ ފަރާތްތަކުން އަންނަނީ ބުނަމުންނެވެ.