ރައީސުލްޖުމްހޫރިއްޔާގެ ރަސްމީ ގެކޮޅު ކަމަށްވާ "މުލިއާގޭގައި" ތިއްބަވާ ސިޔާސީ މުވައްޒަފުންގެ އަދަދު ސިއްރުކޮށްފިއެވެ.

މައުލޫމާތު ހޯދައި ލިބިގަތުމުގެ ބާރުގެ ދަށުން މުލިއާގޭގައި ތިއްބަވާ ސިޔާސީ މުވައްޒަފުންގެ އަދަދާއި މުސާރައަށް ހޭދަވާ ވަރު ހޯދުމަށް "ތޭރަ އޮންލައިން" ގެ ފަރާތުން ރައީސް އޮފީހަށް އާރްޓީއައި އެއް ހުށަހެޅީ މެއި މަހުގެ 26 ވަނަ ދުވަހުއެވެ.

އެ އާރްޓީއައި އަށް ރައީސް އޮފީހުގެ ފަރާތުން ޖަވާބެއް ދެއްވީ ދެ މަސް ފަހުން 25 ޖުލައި 2024 ވީ ބުރާސްފަތި ދުވަހުއެވެ.

އެ ސީޓިގައި ބުނެފައި ވަނީ "އެދިވަޑައިގެންފައިވާ މައުލޫމާތު ސަލާމަތީ ސަބަބުތަކަށްޓަކައި ދެވެން ނެތް" ކަމަށެވެ.

އެއްވެސް ކަމެއްގައި ފޮރުވުމެއް، އޮޅުވާލުމެއް، ސިއްރުކުރުމެއް ނޯންނާނެ ކަމަށް މި ސަރުކާރުން ބުނި ނަމަވެސް ފެނިގެންދަނީ އެންމެ އާދާއިގެ ކަންކަން ވެސް ރައްޔިތުންނަށް ފޮރުވާ އޮޅުވާލައިގެން އުޅޭ މަންޒަރެވެ.

އެގޮތުން އެއްވެސް މައުލޫމާތެއް ހޯދުމަށް އާރްޓީއައި އެއް ހުށަހަޅަން ނުޖެހޭނެކަމަށް ރައީސް ޑރ މުހައްމަދު މުއިއްޒު ވިދާޅުވި ނަމަވެސް މައުލޫމާތު ނުދީ ހިފަހައްޓަމުންގެންދާތީވެ، ނޫސްތަކުން އަންނަނީ އާރްޓީއައި ހުށަހަޅަމުންނެވެ.

ނަމަވެސް އެ އާރްޓީއައިތަކަށް ވެސް ސަރުކާރުން ޖަވާބު ނުދޭކަން ފާހަގަކޮށްލެވެއެވެ.