މި ގައުމުގައި ބޭރުގެ އެއްވެސް އަސްކަރިއްޔާއެއް މެއި މަހުގެ ފަހުން ގާއިމުވެ ނެތް ކަމަށް ޑިފެންސް މިނިސްޓަރު ވިދާޅުވެފައިވާއިރު، އިންޑިއާ ސިފައިންގެ އައު ޓީމެއް ރާއްޖެ އައިސްފިއެވެ.

އިންޑިއާގެ އަސްކަރިއްޔާގެ ކުންފުނި، ހިންދުސްތާނު އެއިރޮނޮޓިކަލް ލިމިޓެޑްގެ މި ގްރޫޕު ރާއްޖެ އައިސްފައިވަނީ މިއަދު މެންދުރު ކުރި 11:30 ހާކަން އިރުއެވެ. ގޭން އިންޓަރނޭޝަނަލް އެއާޕޯޓުގައި މި ސިފައިން ތިއްބާ ކެޕްޗަރކުރެވިފައިވާ މަންޒަރުތައް ހުރިއިރު މި މީހުންނާ ގުޅުން ހުރި އިތުރު މައުލޫމާތެއް ލިބިފައި ނުވި ނަމަވެސް ގޭން އެއާޕޯޓުން ވަނީ އެއީ އިންޑިއާ ސިފައިން ކަން ކަށަވަރުކޮށްދީފައި ކަމަށް މީހަކު މީސް މީޑިޔާގައި ކުރި ޕޯސްޓެއްގައި ބުނެފައިވެއެވެ.

އެޗްއޭއެލްގެ ޔުނިފޯމުގައި ތިބި ހަވަރަކަށް މީހުން ފެންނަ ފޮޓޯއަކާ އެކު ކޮށްފައިވާ މި އެކްސް ޕޯސްޓުގައި ބުނެފައިވަނީ ރައީސް މުހައްމަދު މުއިއްޒު އިތުރަށް ދޮގު ހެދުމެއް ބޭނުމެއް ނެތް ކަމަށެވެ.

މި ސަރުކާރުން ވަނީ އިންޑިއާ ސިފައިން މި ގައުމުން ބާލާފައިކަމަށް ބުނަމުން ދާއިރު ކުރިން ތިބި އަސްކަރީ މީހުން ބޭލުމަށް ފަހު ހަމަ އެ އަދަދަށް ހިންދުސްތާނު އަސްކަރިއްޔާގެ ދަށުން ހިންގާ އެޗްއޭއެލްގެ މީހުން ގެނެސްގެން ސަރުކާރުން ވަނީ ބޮޑު އޮޅުވާލުމެއް ދިވެހި ރައްޔިތުންނަށް އޮޅުވާލާފައެވެ.

މިނިވަން ދުވަހު ބޭއްވި އިހުތިފާޅުގައިވެސް ރައީސް މުއިއްޒު ވަނީ މިހާރު ޔުނިފޯމު ލައިގެންވެސް ނުލާވެސް ބޭރުގެ އަސްކަރިއްޔާ ރާއްޖޭގައި ނުތިބޭނެކަމަށް ވިދާޅުވެފައެވެ. ނަމަވެސް ފެންނަ މަންޒަރުތަކުން އެއީ އިތުރުފުޅެއްކަން ދަނީ ހާމަވަމުންނެވެ.