އެމްއެމްޕީއާރުސީގެ މައްސަލަ މި ސަރުކާރުން ބަލާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވުމުން ރައީސް އަބްދުﷲ ޔާމީންގެ ވަރުގަދަ ޗެލެންޖެއް އަމާޒުކުރައްވައިފިއެވެ.
ރައީސް ޔާމީން މި ޗެލެންޖު ކުރެއްވީ ދަ ފްރޮންޓް އޮފީހުގައި ހޯމަ ދުވަހުގެ ރޭ ބޭއްވި ޖަލްސާގައި ގާނޫނީ ވަކީލު އާދަމް އާސިފްއަށް ސުވާލުތަކެއް އަމާޒުކުރައްވަމުންނެވެ.
އެގޮތުން އެމަނިކުފާނު ވަނީ އެމްއެމްޕީއާރުސީގެ ކަޅު ފައިސާގައި ޖެހުނު އެންމެ ގިނަ މީހުން މިއަދު ތިބީ ރައީސް މުއިއްޒު އަރިހުގައި ކަމަށާ އެހެންކަމުން މި ސަރުކާރަށް އެ މައްސަލަ ބަލަން ނުކެރޭނެ ކަމަށެވެ. އޭގެ ހެއްކަކީ އަދީބުއާ އެކު ޑީލު ހަދާ ފައިސާ ނެގި ޕީޖީއަކުވެސް މަގާމުގައި ބެހެއްޓުން ކަމަށް ވެސް ރައީސް ޔާމީން ވިދާޅުވިއެވެ.
މި ވާހަކަފުޅުތަކާއެކު ރައީސް ޔާމީން ވަނީ ރައީސް މުއިއްޒު ކިބައިގައި އެހާ ހިތްވަރު ހުންނަވައިގެން އެމްއެމްޕީއާރުސީ މައްސަލަ ބަލަން މިނިވަން ބަޔަކު ހިމަނައިގެން ކޮމިޝަނެއް އެކުލަވާލައްވަން ޗެލެންޖެއް ކުރައްވާފައެވެ.
އެމްއެމްޕީއާރުސީގެ ޚިޔާނާތުގެ ލިސްޓު ފޮރުވައިގެން ގެންގުޅުމުގެ ކޮން ގާނޫނީ ހައްގެއް ތޯ ފުލުހުންނަށް އޮތީ. މިއޮތް ސަރުކާރަށް ނުކެރޭނެ އެ ފުރިހަމަ ލިސްޓު ހާމަކުރަން ވެސް އަދި މި ސަރުކާރުގެ ސުޕަރ މެޖޯރިޓީ އޮތް މަޖިލީހަށާ އަދި ފުލުހުންނަށްވެސް އަދި އޭސީސީއަށް ވެސް އެމްއެމްޕީއާރުސީ މައްސަލަ ބަލާކަށް ނުކެރޭނެ. ކެރިވަޑައިގަންނަވަންޏާ އެމްއެމްޕީއާރުސީގެ މައްސަލަ ބަލަން މިނިވަން ކޮމިޝަނެއް އެކުލަވާލައްވާ
ރައީސް ޔާމީން
ރައީސް ޔާމީން ވިދާޅުވީ އެމްއެމްޕީއާރުސީގެ ވާހަކަ ޕީއެންސީ ޖަގަހައިގައި ދެއްކީމާ އެތާ ކުރީ ސަފުން ފެންނަ މާޔޫސްކަމުން އެކަމުގެ ހަގީގަތް ނިކަން ރަގަޅަށް އެނގޭނެ ކަމަށެވެ.
