ދިވެހިރާއްޖޭގައި މިހާރު އޮތީ ޒިންމާދާރު، ވެރިކަން ކުރަން އެގޭ ސަރުކާރެއް ނަމަ ހަފްތާއަކު 2 ދުވަހު ގަރުދިޔަ ޖަގަހަ ހިންގުން ނޫން ކުރަންޖެހޭ އެހެނިހެން ބޮޑެތި ކަންކަން ހުންނަވާނެ ކަމަށް ކުރީގެ ނައިބު ރައީސް ޑރ މުހައްމަަދު ޖަމީލް އަހުމަދު ވިދާޅުވެއްޖެއެވެ.
ޖަމީލް މިހެން ވިދާޅުވީ ޕީއެންއެފް އިން ބުރާސްފަތި ދުވަހުގެ ރޭ ބޭއްވި ފްރޮންޓް އޮފީސް ޖަލްސާގައި ވާހަކަދައްކަވަމުންނެވެ.
ޖަމީލް އިތުރަށް ވިދާޅުވީ ހަފްތާއަކު ދެ ދުވަހު ޕޯޑިއަމްތަކަށް އަރާ ޖަގަހަތައް ހިންގުމުން ދޭހަ ވަނީ ސަރުކާރަށް ވަރަށް ވަގުތު ގިނަވެގެން އުޅޭ މަންޒަރު ކަމަށެވެ. އަދި ވެރިކަމުގައި ކުރައްވަން ޖެހޭ ކަންތައްތައް ކޮށް ނިންމުމަށްފަހު 05 އަހަރުގެ ދައުރު ނިމެންދެން އަތް އުރާލައިގެން ތިއްބެވި މަންޒަރު ކަމަށެވެ.
އިންތިޚާބާއި ދިމާކޮށް އޮއްސާލި ވަޒީފާގެ ފުރުސަތުތަކަށް މީހުން ގިނަ ވެގެން ގިނަ މީހުން މިހާރު ރިޕޯޓް ކުރަނީ ވައިބާރ ގްރޫޕްތަކަށް ކަމަށް ޖަމީލް ވަނީ ފާހަގަކޮށްފައެވެ.
މީގެ އިތުރުން ރާއްޖެ މިއޮތީ ނާޒުކު ހާލަތެއްގައި ކަމަށާއި، އައިއެމްއެފް އިން ލަފާދެއްވި ގޮތަށް އެއްވެސް ފިޔަވަޅެއް އަޅާ ތަނެއް އަދިވެސް ފެނިގެން ނުދާކަމަށްވެސް ޖަމީލް ފާހަގަކުރެއްވިއެވެ.
މަސްވެރިންނަށް ހަމައަށް ލާރު ނުދެވޭ ތަނުގައި، ރާއްޖެއިން ބޭރުގައި ކިޔަވަން ތިބި ދަރިވަރުންނަށް ފައިސާ ފޮނުވުންވެސް މިވަނީ ބޮޑު ތަކުލީފަކަށް ވެފައި ކަމަށް ޖަމީލް ސިފަކުރެއްވިއެވެ.
