ކިތަންމެ ކުޑަ ނަމަވެސް ދަރަންޏެއް އޮވެއްޖެނަމަ އެއީ އޭގެ ސަބަބުން އެމީހެއްގެ ފާފަ ފުއްސެވުމަށް ހުރަސްއެޅިގެންދާނެ ކަމެއް ކަމަށާއި އެހެންކަމުން ލޯ މަރާލުމުގެ ކުރިން އެދަރަނި ދައްކާ ހަލާސް ކުރުމަށް މިއަދުގެ ޚުތުބާގައި ނަސޭހަތްތެރިވެއްޖެއެވެ.

ހަޔާތުގެ ހުޅުކޮޅު ނިވުމުގެ ކުރިން ދަރަނި އަދާކުރުމުގެ މައްޗަށް އަލިއަޅުވާލައި ހުތުބާގައި ބުނީ ދަރަނި ދިނުމާއި ދަރަނި ނެގުމަކީ އިސްލާމް ދީން ހުއްދަކުރާ ކަމެއް ކަމަށެވެ. ދަރަނި ނަގަން ވާނީ އެ ދަރަނި އަދާކުރުމުގެ ނިޔަތުގައި ކަމަށާއި ދަރަނި ދޫކުރި ފަރާތަށް ގެއްލުމެއް ދިނުމުގެ ނިޔަތުގައި ނޫން ކަމަށެވެ. ދަރަނި އަދާކުރަން އަވަސްވެގަތުމަކީ ދަރަނި ނެގި ފަރާތަށާއި ދަރަނި ދޫކުރި ފަރާތަށް އެންމެ ފައިދާ ހުރި ގޮތް ކަމަށެވެ.

ބޮޑެތި ދަރަނިތައް ނަގަން ވާނީ އެފަދަ ދަރަނި އަދާކުރާނެ ގޮތުގެ ހިކުމަތްތެރި ރޭވުމެއް އޮވެގެން ކަމަށާއި ދަރަނި ނުދެއްކި، ޝަރީއަތަށް މައްސަލަ ހުށަހެޅި، ތިމާ ކުށްވެރިވެ، އެކަމުގެ ސަބަބުން ދުނިޔެ އާއި އާހިރަތް ނަގައިލެވޭ ކަމަކަށް އެކަން ވެގެންނެއް ނުވާނެ ކަމަށެވެ. އެފަދަ ދަރަންޏެއް ނެގުމަށް ވުރެ، އައުލާކަން ބޮޑީ ލިބޭ އާމްދަނީ އާ އެއްވަރަށް ހަރަދުތައް ކުޑަކޮށް، އިގުތިސޯދު ކުރުން ކަމަށެވެ.

ހުކުރު ހުތުބާގައި ފާހަގަކުރި ގޮތުގައި ދަރަނި އަދާކުރުމުގެ ނިޔަތުގައި ދަރަނި ނަގާ މީހުންނަށް، ދަރަނި ދެއްކޭނެ ގޮތް، މާތް ﷲ މިންވަރު ކޮށްދެއްވާނެ ކަމުގަ އެވެ. ދަރަނި ނުދައްކައި ލަސްކުރުމަކީ ދޭދޭ އަފުރާދުންގެ މެދުގައި އޮންނަ ލޯތްބާއި ކުލުނު ނެތިދާ ކަމެއް ކަަމުގައިވެސް ފާހަގަކުރެއްވިއެވެ.