ރިޔާސީ އިންތިޚާބްގެ ކެމްޕޭނުގައި އަދުގެ ސަރުކާރުން ވައުދުވި ބޯހިޔާވަހިކަމުގެ މަޝްރޫއުތަކުގެ ތެރެއިން އެއްވެސް މަޝްރޫއެއ ފެށިފައިނުވާ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.

ހައިދަރު މިފަދައިން ވިދާޅުވީ މިއަދުގެ ރައްޔިތުންގެ މަޖިލީހުގެ ޖަލްސާގައި ވައިކަރަދޫ ދާއިރާގެ މެމްބަރު ހުސެއިން ޒިޔާދު ކުރެއްވި ސުވާލަކަށް ޖަވާބުދެއްވަމުންނެވެ.

ހައިދަރު ވިދާޅުވީ، މި ސަރުކާރުން ވެރިކަމާ ހަވާލުވިއިރު ބޯހިޔާވަހިކަމުގެ މަޝްރޫއުތައް އޮތީ މަޑުޖެހިފައި ކަމަށެވެ.

އައު މަޝްރޫއެއް ފެށެން އޮތީ ކުރީ ސަރުކާރުގެ މަޝްރޫއުތަކުގައި ޖެހިފައިހުރި މައްސަލަތައް ހައްލުކޮށްގެން ކަމަށާއި ސަރުކާރުން ކުރަމުންދަނީ އެ މަސައްކަތް ކަމަށް ވިދާޅުވެ ހައިދަރު ވަނީ ބަހަނާ ދައްކަވާފައެވެ.

މި ސަރުކާރުން ކުރަން ވައުދުވި ގިނަ ކަންކަން ނުކުރާތީވެ، ގިނަ ބަޔަކު އަންނަނީ ސަރުކާރަށް ފާޑުކިޔުން އަމާޒުކުރަމުންނެވެ.