ސަރުކާރު ޖަވާބުދާރީކުރުމަށް މިއަދު މަޖިލީހުގައި ޖާގައެއް ނެތް ކަމަށް ގަލޮޅު ދެކެނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.

މީކާއީލް މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެެވެ.

މިއަދު ކުރިއަށްދާ ރައްޔިތުންގެ މަޖިލީހުގެ ޖަލްސާގައި ހައުސިން މިނިސްޓަރު ހާޒިރުކޮށް ސުވާލުކުރުމުގެ ތެރޭގައި ހޫނުވެ އެމްޑީޕީގެ ހަތަރު މެންބަރެއްގެ ނަން އިއްވައި ޖަލްސާ ދޫކުރަން ރިޔާސަތުން އެންގިއެވެ.

އެ މެމްބަރުންގެ ތެރޭގައި ހިމެނެނީ ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލަމެންޓަރީ ގްރޫޕުގެ ލީޑަރު އިބްރާހިމް ނާޒިލް އާއި ވައިކަރަދޫ ދާއިރާގެ މެންބަރު ހުސެއިން ޒިޔާދާއި ކެންދޫ ދާއިރާގެ މެންބަރު މައުރޫފް ޒާކިރާއި ކެޔޮދޫ ދާއިރާގެ މެންބަރު މުހައްމަދު ނިއުޝާދެވެ.

މައްސަލަ ހޫނުވީ ވައިކަރަދޫ މެންބަރު ޒިޔާދު ކުރެއްވި ސުވާލަކަށް މިނިސްޓަރު ސާފު ޖަވާބެއް ނުދެއްވުމުންނެވެ. ޒިޔާދު ކުރެއްވި ސުވާލަކީ، ކުރީގެ ސަރުކާރުން ދީފައިވާ ގޯއްޗާއި ފްލެޓު ނުއަތުލާނެ ކަމަށް ވައުދުވުމަށްފަހު އެ ސިޔާސަތު މިނިސްޓްރީން ބަދަލު ކުރީ ރައީސް ޑރ. މުހައްމަދު މުއިއްޒުއާ މަޝްވަރާ ކުރައްވާފައިތޯ އެވެ.

އެ ސުވާލަށް ޖަވާބު ދެއްވަމުން މިނިސްޓަރު ހައިދަރު ވިދާޅުވީ ފްލެޓާއި ގޯތި އެއްވެސް މީހެއްގެ އަތުން އަތުލާނީ ލިބިފައި ވަނީ ހައްގުވެރިންނަށްތޯ ނުވަތަ ނޫންތޯ ބެލުމަށްފަހު ކަމަށެވެ.

އެ ސުވާލަށް ޖަވާބު ނުލިބުމުން ޒިޔާދު ވަނީ ނިޒާމީ ނުކުތާއެއް ނަންގަވައި އެކަން ފާހަގަ ކުރައްވައިފަ އެވެ. ނަމަވެސް ރިޔާސަތުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ އެއީ ނިޒާމީ ނުކުތާއެއް ކަމަށް ބަލައިނުގަނެވޭނެ ކަމަށެވެ.

އޭގެ ފަހުން ޒިޔާދާއި މައުރޫފް އާއި ނިއުޝާދު އަދި އެމްޑީޕީގެ ބައެއް އެހެން މެންބަރުން ގޮނޑިން ތެދުވެވަޑައިގެން ރިޔާސަތާ މުހާތަބު ކުރުމަށް މޭޒު ކައިރިއަށް ވަޑައިގަތެވެ. މަޖިލީހުގެ ނިޒާމު ހިފެހެއްޓުމަށާއި ގަވާއިދަށް ހުރުމަތްތެރިކޮށް ހިދުމަށް އެހާ ހިސާބުން އަބްދުއްރަހީމް އެންގެވި އެވެ.

ނަމަވެސް އެ ތިން މެންބަރުން ވެސް އެނބުރި ގޮނޑިތަކަށް ވަޑައިނުގަތުމުން އެންމެފަހުން ނަން އިއްވައި މަޖިލިސް ޖަލްސާ ދޫކުރަން އެ ތިން މެންބަރުންނަށް ރިޔާސަތުން އެންގެވި އެވެ. އެއަށްފަހު އެ މެންބަރުން ޖަލްސާ ދޫކުރައްވަންދެން ޖަލްސާ ވަނީ މެދުކަނޑާލައިފައެވެ.

މިކަމަށް އިޝާރާތްކުރައްވާ މީކާއިލް ވިދާޅުވީ، މަޖިލީހުގެ އެންމެ މުހިއްމު މަސްއޫލިއްޔަތު ކަމުގައިވާ ސަރުކާރު ޖަވާބުދާރީކުރުމަށް މިއަދު މަޖިލީހުގައި ޖާގައެއް ނެތްކަމަށެވެ.

މާލޭ ބޯހިޔާވަހިކަމާ ގުޅޭ ސުވާލުތަކަށް މިނިސްޓަރ ހައިދަރު ޖަވާބު ނުދެއްވާކަން، ރިޔާސަތުގެ ސަމާލުކަމަށް ގެނައުމުގެ ނަތީޖާއަކީ އެމްޑީޕީ މެންބަރުން ނަންއިއްވާ ބޭރުކުރުން ކަމަށް ވިދާޅުވެ މީކާއީލްވަނީ ނުރުހުން ފާޅުކުރައްވާފައެވެ.