ރައީސް އަބްދުﷲ ޔާމީން އިންނަވައިގެން ތަހުގީގު ކުރާ ކަމަކާ ކުރިމަތިލާން މަޖިލިސް ރައީސްގެ މަގާމުގައި ހުރި އަބްދުއްރަހީމަށް ކެރޭނެތޯ އައްސަވާ އެމަނިކުފާނުގެ ސުވަލެއް އަމާޒުކުރައްވައިފިއެވެ.

ރައީސް ޔާމީން މިފަދަ ސުވާލެއް އަމާޒުކުރެއްވީ ދަ ފްރޮންޓު އޮފީހުގައި ކުރިއަށް ދިޔަ ޖަލްސާއެއްގައި ވާހަކަފުޅު ދައްކަވަމުންނެވެ.

އެގޮތުން އެމަނިކުފާނު ޖަލްސާއެއްގައި ވާހަކަފުޅު ދައްކަވަމުން އެމްއެމްޕީއާރުސީ މައްސަލަ ބައްލަވަން ރައީސް މުހައްމަދު މުއިއްޒަށް ކެރިވަޑައިނުގަންނަވާނެކަމަށާ އެއީ ރައީސް މުއިއްޒުގެ ރޯލު މޮޑެލްވެސް އެ ޚިޔާނާތުގައި ހިމެނޭތީކަމަށް ވިދާޅުވުމުން އެކަމަށް ރައްދުދީ އަދުރޭ ވަނީ އެމްއެމްޕީއާރުސީ މައްސަލަ ބަލަން ދެ ކޮމިޝަނެއް ހަދާ އޭގެ ތެރެއިން ރައީސް ޔާމީންގެ މައްސަލަ ބަލާ ކޮމިޝަންގެ އެންމެ އިސް މީހަކަށް އޭނާ އައްޔަންކޮށް އަދި އޭނާގެ މައްސަލަ ކޮމިޝަންގެ އެންމެ އިސްމީހަކަށް ރައީސް ޔާމީން އައްޔަންކުރަން ވިދާޅުވެފައިކަން ރައީސް ޔާމީން ފާހަގަކުރެއްވިއެވެ.

ރައީސް ޔާމީން ވިދާޅުވީ، ރައީސް މުއިއްޒު މޭޔަރުކަމުގައި ހުންނަވައިގެން މާލޭގެ މަސް މާރުކޭޓޫވެސް އަދުރޭއާ އާއިލީ ގުޅުން އޮންނަ މީހަކަށް ދިން މައްސަލަ ނުބެލޭ ކަމަށާ އަދި އެމްއެމްޕީއާރުސީ މައްސަލައިގައިވެސް އަދީބު އަތުން އެކި ފަހަރުމަތިން އެންމެ ގިނަ ފައިސާ ނަގާފައި ހުރި އެކަކީ އަދުރޭކަން އެ މައްސަލައިގައި ހިމެނޭ އޮއިއްޓޭގެ ބަޔާނުންވެސް އެނގެން އޮތް ކަމަށެވެ.

ރައީސް ޔާމީން އިތުރަށް ވިދާޅުވީ، މި ސަރުކާރުގެ މަތިފަޑީގައާ އަދި ޕީއެންސީ ޖަގަހައިގެ ކުރީ ސަފުގައިވެސް ގިނައިން ތިބީ އެމްއެމްޕީއާރުސީގެ މައްސަލައިގެ މަސްލަހަތު އޮތް މީހުން ކަމަށެވެ. އެގޮތުން ރެމްއެމްޕީއާރުސީގެ ޚިޔާނާތުގެ ފައިސާ ލިބުނު އެންމެ ގިނަ މީހުން މިހާރު ތިބީ ރައީސް މުއިއްޒުގެ އެންމެ އަރިސް މީހުންގެ ގޮތުގައި ކަމަށްވެސް ރައީސް ޔާމީން ވިދާޅުވިއެވެ.